துாத்துக்குடி:துாத்துக்குடி மாவட்டம், கோவில்பட்டி அருகே கழுகுமலையில் சுண்ணாம்புகளவாசல் பஸ் நிறுத்தம் அருகே உள்ள மின்கம்பத்திற்கு கீழ் மக்களுக்கு வினியோகம் செய்ய வேண்டிய தபால்கள் நேற்று குப்பையில் சிதறி கிடந்தன. அப்பகுதி மக்கள் அதிர்ச்சியடைந்தனர்.

திருச்சி, விழுப்புரம், நாலுமாவடி, செவல்பட்டி உள்ளிட்ட பல்வேறு பகுதிகளில் இருந்து வந்து, மக்களுக்கு விநியோகம் செய்யப்பட வேண்டிய தபால்கள் என, தெரியவந்தது.

அப்பகுதி மக்கள் தபால் நிலையத்தில் தகவல் கொடுத்தும் யாரும் கண்டுகொள்ளாமல் இருந்தனர்.

இதற்கிடையே, அந்த தபால்கள் அனைத்தும் திடீரென தீயிட்டு கொளுத்தப்பட்ட சம்பவம் பரபரப்பை ஏற்படுத்தி உள்ளது.

சம்பந்தப்பட்ட கழுகுமலை தபால் நிலைய அதிகாரிகள் கூறுகையில், 'தபால்கள் குப்பையில் கிடப்பதாக எங்களுக்கு புகார் வந்தது. நாங்கள் அங்கு சென்று பார்ப்பதற்குள் தீயில் எரிந்த நிலையில் இருந்தது. உரிய விசாரணை நடத்தி நடவடிக்கை எடுக்கப்படும்' என்றனர்.