திருவாடானை: ராமநாதபுரம் மாவட்டம் திருவாடானை தாலுகாவில் நில அளவை செய்வதற்காக ரூ.3500 லஞ்சம் வாங்கி கைதான பனிச்சகுடி வி.ஏ.ஓ., நைனாமுகமது 31, தலையாரி சித்ரா 48 , 'சஸ்பெண்ட்' செய்யப்பட்டனர்.திருவாடானை தாலுகா பெருவாக்கோட்டையை சேர்ந்தவரின் நிலத்தை அளப்பதற்காக பனிச்சகுடி குரூப் வி.ஏ.ஓ., நைனாமுகமதுவை அணுகினார். அதற்கு வி.ஏ.ஓ., ரூ.4000 லஞ்சம் கேட்டார். ரூ.3500 தருவதாக பேரம் பேசப்பட்டது.

லஞ்சம் கொடுக்காத விரும்பாத அந்த நபர் ,ராமநாதபுரம் லஞ்ச ஒழிப்பு போலீசில் புகார் செய்தார். போலீசார் ரசாயனம் தடவிய ரூபாய் நோட்டுகளை மே 8 ல் பெருவாக்கோட்டை கிராமத்தில் உள்ள வி.ஏ.ஓ., அலுவலகத்தில் வி.ஏ.ஓ., நைனாமுகமது முன்னிலையில் தலையாரி சித்ராவிடம் கொடுத்தார்.

மறைந்திருந்த ராமநாதபுரம் லஞ்ச ஒழிப்பு டி.எஸ்.பி., ராமச்சந்திரன் தலைமையிலான போலீசார் நைனாமுகமது, சித்ராவை கைது செய்தனர். வி.ஏ.ஓ.,வை, ராமநாதபுரம் ஆர்.டி.ஓ., ராஜமனோகரன் சஸ்பெண்ட் செய்து உத்தரவிட்டார். தலையாரியை, திருவாடானை தாசில்தார் ஆண்டி சஸ்பெண்ட் செய்தார்.