புதுடில்லி: போர் நிறுத்த அறிவிப்புக்குப் பின், இந்தியா - பாகிஸ்தான் இடையே டி.ஜி.எம்.ஓ.,க்கள் நேற்று பேச்சு நடத்தினர். இருதரப்பிலும் இனி தாக்குதல் நடத்தக்கூடாது என முடிவு செய்யப்பட்டுள்ளதாக தகவல் வெளியாகியுள்ளது.

பஹல்காம் சம்பவத்திற்கு பதிலடியாக, 'ஆப்பரேஷன் சிந்துார்' என்ற பெயரில், நம் பாதுகாப்புப் படையினர் பாகிஸ்தான் மீது தாக்குதல் தொடுத்தனர். இதற்கிடையே கடந்த 10ம் தேதி, இருதரப்பிலும் போர்நிறுத்த அறிவிப்பு வெளியிடப்பட்டது.

இதைத் தொடர்ந்து, இருநாடுகளின் டி.ஜி.எம்.ஓ., எனப்படும் ராணுவ நடவடிக்கைகளுக்கான டைரக்டர் ஜெனரல்கள் நேற்று பேச்சு நடத்தினர்.

அப்போது, இருதரப்பிலும் போர் நிறுத்த நடவடிக்கைகளை சுமூகமாக கடைப்பிடிப்பது, ஒரு துப்பாக்கிச் சூடு சம்பவம்கூட நிகழக்கூடாது எனவும், எந்தவொரு ஆக்கிரமிப்பு மற்றும் விரோத நடவடிக்கைகள் துவங்கக்கூடாது எனவும் பரஸ்பரம் உறுதி செய்ததாக தகவல்கள் வெளியாகி உள்ளன.