அன்புமணி - ராமதாஸ் இடையே பிரச்னை ஏற்பட நீங்கள்தான் காரணம் என சொல்லப்படுகிறதே என, ஜி.கே. மணியிடம் நிருபர்கள் கேட்டனர். அதற்கு பதில் அளித்த மணி, 'என்னைப் பற்றி யாரும் தவறாக பேசுவது என்பது, என்னை கத்தியால் குத்துவது போன்றது. 45 ஆண்டுகளாக இந்த கட்சியில் உள்ளேன். ஒரு உயிருக்குக்கூட தீங்கு நினைத்ததில்லை. பல கட்சிகளில் இருந்தும் எனக்கு அழைப்புகள் வந்தன. ஆனால், அந்த வாய்ப்புகளையெல்லாம் புறம் தள்ளிவிட்டுத்தான், பா.ம.க.,வில் பயணிக்கிறேன். இந்தப் பயணம் எனக்கு சுகமானது,'' என்றார்.

நேற்று முன்தினம் தைலாபுரத்தில் பா.ம.க., மாவட்டத் தலைவர்கள், மாவட்டச் செயலர்கள் கூட்டத்தை கூட்டி, அனைத்து நிர்வாகிகளையும் அழைத்திருந்தார் கட்சியின் நிறுவனத் தலைவர் ராமதாஸ். ஆனால், 216 பேரில் 13 பேர் தவிர, மற்றவர்கள் யாரும் வரவில்லை. இதனால் கோபமான ராமதாஸ், கூட்டத்துக்கு ஏன் வரவில்லை எனக் கேட்டு, தன்னுடைய உதவியாளர் வாயிலாக மாவட்ட தலைவர்கள், செயலர்களிடம் பேசச் சொல்லி உள்ளார். அதைத் தொடர்ந்து உதவியாளர், அனைவரையும் தொடர்பு கொண்டபோது, பலர் போன் எடுக்கவில்லை. பலர் சுவிட்சுடு ஆப் செய்திருந்தனர். கூட்டம் நடந்த நாளுக்கு முதல் நாளே, பா.ம.க., தலைவர் அன்புமணி தரப்பில், மாவட்டத் தலைவர்கள் மற்றும் மாவட்டச் செயலர்களை தொடர்பு கொண்டு பேசியுள்ளனர். அப்போது, ராமதாஸ் ஏற்பாடு செய்துள்ள கூட்டத்துக்கு போக வேண்டாம் என அன்புமணி சொல்லச் சொன்னதாக சொல்லி உள்ளனர். கூடவே, இது அன்புமணியிடமிருந்து வரும் உத்தரவு தான் என்பதை காட்டுவதற்காக, அன்புமணி செல்போனில் இருந்து மிஸ்டு கால் மட்டும் வரும் என்றும் சொல்லி உள்ளனர். அதேபோல, மாவட்டத் தலைவர்கள் மற்றும் மாவட்டச் செயலர்களுக்கு அன்புமணி செல்போனில் இருந்து மிஸ்டு கால் கொடுக்கப்பட்டிருக்கிறது. அதையடுத்தே, ராமதாஸ் கூட்டிய கூட்டத்துக்கு பெரும்பாலான நிர்வாகிகள் செல்லாமல் புறக்கணித்து விட்டதாக, அன்புமணி ஆதரவாளர்கள் தெரிவித்தனர்.