தேனி: தேனி எல்.எஸ்., மில்ஸ் கூடைப்பந்து சங்கம் சார்பில், மாவட்டங்களுக்கு இடையிலான கூடைப்பந்து போட்டி, தேனி மாவட்ட விளையாட்டு மேம்பாட்டு ஆணைய உள்விளையாட்டு அரங்கத்தில் பகலிரவு போட்டிகள் நேற்று துவங்கியது. நாக் அவுட்'முறையிலான முதல் போட்டியை எல்.எஸ்., மில்ஸ் இயக்குனர்கள் சிந்தியா, ஐஸ்வர்யா துவக்கி வைத்தனர். முதல் போட்டியில் வடுகப்பட்டி டாக்டர் ஜி.எஸ்., அகாடமி அணியும், கம்பம் பள்ளத்தாக்கு கூடைப்பந்து கிளப் அணியும் மோதின. இதில் 53:69 என்ற புள்ளிக்கணக்கில் கம்பம் பள்ளத்தாக்கு அணி வெற்றி பெற்றது.

ஜி.எஸ்., அகாடமி அணி வீரர் ரிஷி 18 புள்ளிகள் பெற்றார். இரண்டாவது போட்டியை பாலசங்கா நிர்வாக இயக்குனர் செந்தில்நாராயணன், தேனி நகராட்சியின் துணைத் தலைவர் செல்வம் துவக்கி வைத்தனர்.

இதில் தேனி டவுன் டீம் அகாடமி அணியும், போடி ஹூப் ஸ்டார் அகாடமி அணியும் மோதின. இதில் 69: 102 புள்ளிக்கணக்கில் போடி அணி வெற்றி பெற்றது. தேனி டவுன் டீம் அகாடமி அணியின் வீரர் தாணு அதிகபட்சமாக 37 புள்ளிகள் பெற்றார். மூன்றாவது போட்டியை சைபர் கிரைம் ஏ.டி.எஸ்.பி., ஜெரால்டு அலெக்சாண்டர் துவக்கி வைத்தார்.

இதில் வடுகப்பட்டி கூடைப்பந்து அணியும், வடுகப்பட்டி பேராசிரியர் ஜெயந்த் நினைவு கூடைப்பந்து அணியும் மோதின. இதில் 101:66 என்ற புள்ளிக்கணக்கில் வடுகப்பட்டி கூடைப்பந்து அணி வெற்றி பெற்றது. இதில் வடுகப்பட்டி கூடைப்பந்து அணி வீரர் விக்னேஷ் 47, புள்ளிகள் பெற்றார். பேராசிரியர் ஜெயந்த் நினைவு கூடைப்பந்து அணி வீரர் தருண் 20 புள்ளிகள் பெற்றார். இன்று லீக் சுற்று போட்டிகள் நடைபெற உள்ளது.