கார்டிப்: பிரிட்டிஷ், இரிஷ் பாரா பாட்மின்டனில் இந்தியாவுக்கு 3 தங்கம் உட்பட 21 பதக்கம் கிடைத்தது.

இங்கிலாந்தின் கார்டிப் நகரில், மாற்றுத்திறனாளிகளுக்கான பிரிட்டிஷ், இரிஷ் பாரா பாட்மின்டன் தொடர் நடந்தது. பெண்கள் ஒற்றையர் 'எஸ்.எச்.6' பிரிவு பைனலில் இந்தியாவின் நித்யா ஸ்ரீ 21-11, 21-23, 21-11 என பெருவின் கியுலியானா போவேடாவை வீழ்த்தி தங்கம் வென்றார்.

பெண்கள் ஒற்றையர் 'எஸ்.யு.5' பிரிவு பைனலில் இந்தியாவின் துளசிமதி முருகேசன் 18-21, 21-17, 21-16 என்ற கணக்கில் சகவீராங்கனை மணிஷா ராமதாசை தோற்கடித்து தங்கத்தை தட்டிச் சென்றார்.

ஆண்கள் இரட்டையர் 'எஸ்.எல்.3 - எஸ்.எல்.4' பிரிவு பைனலில் இந்தியாவின் ஜெகதீஷ், நவீன் ஜோடி, நான்கு போட்டியிலும் வெற்றி பெற்று புள்ளிப்பட்டியலில் முதலிடம் பிடித்து தங்கம் வென்றது.
மற்ற பிரிவு போட்டியில் இந்தியாவின் சுகந்த் கடம், சஞ்சனா குமாரி, உமேஷ் குமார், சூர்யா வெள்ளிப் பதக்கம் வென்றனர். இத்தொடரில் இந்தியாவுக்கு 3 தங்கம், 5 வெள்ளி, 13 வெண்கலம் என, மொத்தம் 21 பதக்கம் கிடைத்தது.