குன்னுார்; நீலகிரி மாவட்டம், குன்னுார் பர்லியார் தோட்டக்கலை பண்ணையில், துரியன், மங்குஸ்தான் உட்பட பல்வேறு பழ நாற்றுகள் உற்பத்தி செய்யப்பட்டு விற்பனை செய்யப்பட்டு வருகிறது.

இங்கு வளர்க்கப்பட்ட ரம்புட்டான் மரத்தில் தற்போது முதல் முறையாக மஞ்சள் ரம்புட்டான் பழங்கள் விளைந்துள்ளன.

பொதுவாக சிவப்பு நிறத்தில் ரம்புட்டான் பழங்கள் வெளி மார்க்கெட்டில், 350 ரூபாய் வரை விற்பனை செய்யப்படுகிறது. அதில், மஞ்சள் நிறத்தில் உள்ள இந்த வகை ரம்புட்டான் பழம் தென்கிழக்கு ஆசியாவை சேர்ந்தது.

தோட்டக்கலை துறையினர் கூறுகையில், 'ரம்புட்டான் பழங்களில் வைட்டமின் சத்துக்கள் நிறைந்துள்ளன. ரம்புட்டானின் எளிதில் உரிக்கப்படக்கூடிய தோல் முதிர்ச்சியடையும் போது மஞ்சள் நிறமாக மாறுகிறது. இவை இனிப்பு மற்றும் நறுமண சுவை கொண்டவை. முதல் முறையாக இந்த மரத்தில் விளைந்த மஞ்சள் நில பழங்களின் விதைகள் சேகரித்து நாற்றுக்கள் தயார் செய்து வளர்க்க நடவடிக்கை எடுக்கப்படும்,' என்றனர்.