அரையிறுதியில் போலந்து
தாஷ்கென்ட்: உஸ்பெகிஸ்தானில் நடக்கும் ஆண்களுக்கான (19 வயது) உலக வாலிபால் சாம்பியன்ஷிப் காலிறுதியில் போலந்து, தென் கொரியா அணிகள் மோதின. இதில் போலந்து அணி 3-2 (25-17, 24-26, 27-25, 19-25, 15-13) என்ற கணக்கில் வெற்றி பெற்றது.


ரிபாகினா வெற்றி

மான்ட்ரியல்: கனடாவின் மான்ட்ரியலில் நடக்கும் நேஷனல் பாங்க் ஓபன் டென்னிஸ் தொடரின் 3வது சுற்றில் கஜகஸ்தானின் எலினா ரிபாகினா 6-0, 7-5 என்ற நேர் செட் கணக்கில் ருமேனிய வீராங்கனை ஜாக்குலின் கிறிஸ்டியனை வீழ்த்தினார்.

ஜெர்மனி அதிர்ச்சி

பெல்கிரேடு: செர்பியாவில் நடக்கும் 'யூரோ' கூடைப்பந்து (18 வயது) காலிறுதியில் ஜெர்மனி, லாட்வியா அணிகள் மோதின. ஜெர்மனி 79-80 என அதிர்ச்சி தோல்வியடைந்தது. மற்றொரு காலிறுதியில் இத்தாலி அணி 95-66 என, செர்பியாவை வீழ்த்தியது.

ஹங்கேரி கலக்கல்

போட்கோரிகா: மான்டினெக்ரோவில் நடக்கும் பெண்கள் (17 வயது) ஐரோப்பிய ஹேண்ட்பால் சாம்பியன்ஷிப் லீக் போட்டியில் ஹங்கேரி அணி 35-28 என நார்வேயை வீழ்த்தியது. மற்றொரு போட்டியில் குரோஷியா 39-29 என, ருமேனியாவை தோற்கடித்தது.

எக்ஸ்டிராஸ்

* துலீப் டிராபி கிரிக்கெட் தொடருக்கான மேற்கு மண்டல அணியின் கேப்டனாக மும்பை 'ஆல்-ரவுண்டர்' ஷர்துல் தாகூர் நியமிக்கப்பட்டார். இந்த அணியில் ஷ்ரேயஸ், ருதுராஜ், ஜெய்ஸ்வால், சர்பராஸ் கான் உள்ளிட்டோர் இடம் பெற்றுள்ளனர்.


* சவுதி அரேபியாவில் நடக்கவுள்ள ஆசிய கோப்பை கூடைப்பந்து 31வது சீசனில் 'சி' பிரிவில் இடம் பெற்றுள்ள இந்திய அணி, ஜோர்டான் (ஆக. 5), சீனா (ஆக. 7), சவுதி அரேபியாவை (ஆக. 9) சந்திக்கிறது.


* டில்லியில், வரும் ஆக. 21ல் நடக்கவுள்ள ஆண்டு பொதுக்குழு கூட்டத்தில், இந்திய குத்துச்சண்டை கூட்டமைப்பின் நிர்வாகிகள் தேர்தல் நடத்தப்படுகிறது.


* மணிப்பூர் தலைநகர் இம்பாலில் நடந்த துாரந்த் கோப்பை கால்பந்து லீக் போட்டியில் இந்திய கடற்படை அணி 2-1 என்ற கோல் கணக்கில் ரியல் காஷ்மீர் அணியை வீழ்த்தியது.


* தாய்லாந்தில் நடக்கும் ஆசிய குத்துச்சண்டை சாம்பியன்ஷிப் (19 வயது) முதல் சுற்றில் இந்திய வீராங்கனை சுமன் குமாரி (48 கி.கி.,) 5-0 என சீனதைபேயின் மெங்-சின் செங்கை வீழ்த்தினார்.