பாரிஸ்: உலக பாட்மின்டன் காலிறுதியில் இந்திய வீராங்கனை சிந்து தோல்வியடைந்தார்.

பிரான்ஸ் தலைநகர் பாரிசில், உலக பாட்மின்டன் சாம்பியன்ஷிப் தொடர் நடக்கிறது. இதன் பெண்கள் ஒற்றையர் பிரிவு காலிறுதியில் உலகின் 'நம்பர்-15' இந்தியாவின் சிந்து, 9வது இடத்தில் உள்ள இந்தோனேஷியாவின் புத்ரி வர்தானி மோதினர்.

முதல் செட்டை 14-21 என இழந்த சிந்து, பின் எழுச்சி கண்டு 2வது செட்டை 21-13 எனக் கைப்பற்றி பதிலடி கொடுத்தார். வெற்றியாளரை நிர்ணயிக்கும் 3வது செட்டில் ஏமாற்றிய சிந்து 16-21 எனக் கோட்டைவிட்டார். ஒரு மணி நேரம், 4 நிமிடம் நீடித்த போட்டியில் சிந்து 14-21, 21-13, 16-21 என்ற கணக்கில் தோல்வியடைந்து வெளியேறினார்.
கலப்பு இரட்டையர் பிரிவு காலிறுதியில் இந்தியாவின் துருவ் கபிலா, தனிஷா கிராஸ்டோ ஜோடி 15-21, 13-21 என்ற நேர் செட் கணக்கில் மலேசியாவின் டாங் ஜீ சென், ஈ வெய் தோ ஜோடியிடம் தோல்வியடைந்தது.