சென்னை: புரோ கபடி லீக் போட்டியில் தெலுங்கு டைட்டன்ஸ் அணி, 7வது வெற்றியை பதிவு செய்தது. தமிழ் தலைவாஸ் அணி, பெங்களூருவிடம் தோல்வியடைந்தது.

இந்தியாவில், புரோ கபடி லீக் 12வது சீசன் நடக்கிறது. தமிழ் தலைவாஸ், 'நடப்பு சாம்பியன்' ஹரியானா, மும்பை உள்ளிட்ட 12 அணிகள் பங்கேற்கின்றன.


சென்னையில் நடந்த லீக் போட்டியில் தெலுங்கு டைட்டன்ஸ், உ.பி., அணிகள் மோதின. முதல் பாதி முடிவில் தெலுங்கு டைட்டன்ஸ் அணி 22-16 என முன்னிலையில் இருந்தது. தொடர்ந்து அசத்திய தெலுங்கு டைட்டஸ் அணி, ஆட்டநேர முடிவில் 40-35 என்ற கணக்கில் வெற்றி பெற்றது. தெலுங்கு டைட்டன்ஸ் அணிக்கு 'ஆல்-ரவுண்டர்' பாரத் (14 புள்ளி), கேப்டன் விஜய் மாலிக் (9) கைகொடுத்தனர். உ.பி., அணி சார்பில் பவானி ராஜ்புட் 16 புள்ளி பெற்றார்.

இதுவரை விளையாடிய 12 போட்டியில், 7 வெற்றி, 5 தோல்வி என, 14 புள்ளிகளுடன் தெலுங்கு டைட்டன்ஸ் அணி 3வது இடத்துக்கு முன்னேறியது. ஏழாவது தோல்வியை பெற்ற உ.பி., அணி (8 புள்ளி) 9வது இடத்தில் உள்ளது.


மற்றொரு லீக் போட்டியில் தமிழ் தலைவாஸ், பெங்களூரு அணிகள் மோதின. இதில் தமிழ் தலைவாஸ் 29-33 என்ற கணக்கில் தோல்வியடைந்தது.