லண்டன்: இந்தியா-பிரிட்டன் இடையேயான தடையற்ற வர்த்தக ஒப்பந்தம் (எப்டிஏ)விதிகள் சார்ந்த வர்த்தகத்திற்குப் பலம் சேர்ப்பதாகப் பிரிட்டீஷ் பிரபுக்கள் சபையின் சர்வதேச ஒப்பந்தங்கள் குழு தெரிவித்துள்ளது.
இந்தியா-பிரிட்டன் இடையேயான தடையற்ற வர்த்தக ஒப்பந்தம், அனைவருக்கும் ஒரு முன்னுதாரணமாக இருக்கும் என்று பிரிட்டன் பார்லி குழு அறிக்கை வெளியிட்டுள்ளது.


பிரிட்டீஷ் பிரபுக்கள் சபை குழு வெளியிட்டுள்ள அறிக்கை:இந்தியா-பிரிட்டன் இடையேயான இந்த ஒப்பந்தம் மூலம் 2040ம் ஆண்டிற்குள் இரு தரப்பு வர்த்தகம் 2,76,675 கோடி ரூபாய் (£25.5 பில்லியன்)உயரும் என எதிர்பார்க்கப்படுகிறது.
இந்தியாவிலிருந்து ஏற்றுமதியாகும் ஜவுளி மற்றும் தோல் பொருட்களுக்கு பிரிட்டனில் வரி விலக்கு கிடைக்கும். அதேபோல், பிரிட்டனின் ஸ்காட்ச் விஸ்கி மீதான வரி 150%-லிருந்து 75%-ஆக குறைக்கப்படும்.


75,000 இந்தியப் பணியாளர்கள் பிரிட்டனின் சமூக பாதுகாப்பு வரி செலுத்துவதிலிருந்து 36 மாதங்களுக்கு விலக்கு பெறுவார்கள். இது இந்தியத் தொழிலாளர்களுக்கு ஆண்டுக்கு 4,513.5 கோடி ரூபாய் ( $500 மில்லியன் ) கிடைக்கப்பெறும்.
முதல்முறையாக, இந்தியாவின் 4,12,300 கோடி ரூபாய் (£38 பில்லியன் )மதிப்புள்ள அரசு ஒப்பந்தங்களில் பங்கேற்க பிரிட்டன் நிறுவனங்களுக்கு அனுமதி வழங்கப்பட்டுள்ளது.
இருப்பினும், பிரிட்டனுக்கான முழுமையான பலன்கள் கிடைக்க 15 ஆண்டு வரை ஆகலாம், சேவைத் துறையில் கூடுதல் கவனம் தேவை.


இவ்வாறு பிரிட்டீஷ் பிரபுக்கள் சபை குழு அறிக்கையில் குறிப்பிட்டுள்ளது