புதுடில்லி: 2028ம் ஆண்டு நடக்கும் டி20 உலகக்கோப்பை கிரிக்கெட் தொடருக்கு இந்தியா உள்ளிட்ட 12 அணிகள் நேரடியாக தகுதி பெற்றுள்ளன.

2026 டி20 உலகக்கோப்பை கிரிக்கெட் தொடர் தற்போது இந்தியா மற்றும் இலங்கையில் நடந்து வருகின்றன. தற்போது, லீக் போட்டிகள் முடிவடைந்த நிலையில், சூப்பர் 8 சுற்று ஆட்டங்கள் வரும் 21ம் தேதி முதல் துவங்க இருக்கின்றன.

இந்த நிலையில், 2028ம் ஆண்டு நடக்கும் டி20 உலகக்கோப்பை கிரிக்கெட் தொடருக்கு நேரடியாக தகுதி பெற்றுள்ள அணிகளின் விபரங்கள் வெளியாகியுள்ளன. அதாவது, தற்போது நடந்து வரும் டி20 உலகக்கோப்பை தொடரில் சூப்பர் 8 சுற்றுக்கு முன்னேறியதன் அடிப்படையில் அணிகள் தேர்வு செய்யப்பட்டுள்ளன.

அதன்படி, இந்தியா, தென்னாப்ரிக்கா, ஜிம்பாப்வே, வெஸ்ட் இண்டீஸ், நியூசிலாந்து, இங்கிலாந்து, பாகிஸ்தான் மற்றும் இலங்கை அணிகள் தேர்வாகியுள்ளன. அதேபோல, ஐசிசி தரவரிசையின் அடிப்படையில் வங்கதேசம், ஆப்கானிஸ்தான் மற்றும் அயர்லாந்து அணிகள் தகுதிபெற்றுள்ளன. சூப்பர் 8 சுற்றுக்கு தகுதி பெறாத ஆஸ்திரேலிய அணி, 2028 உலகக்கோப்பை தொடரை நடத்தும் அணி என்றதன் அடிப்படையில் தேர்வாகியுள்ளது.