பெ.நா.பாளையம்: பெரியநாயக்கன்பாளையம் அருகேயுள்ள கூடலுார் நகராட்சியில், நகர்ப்புற ஆரம்ப சுகாதார நிலையம் திறக்கப்பட்டுள்ளது.

கூடலுார் நகராட்சி, 14வது வார்டு காமாட்சிபுரத்தில், 2023--24ம் ஆண்டில், 15வது நிதிக்குழு திட்டத்தில், ரூ.1.2 கோடி மதிப்பில் நகர்ப்புற சுகாதார நிலையத்துக்கு கட்டப்பட்ட கட்டடத்தை, முதல்வர் ஸ்டாலின் காணொலி வாயிலாக திறந்து வைத்தார். நகராட்சி தலைவர் அறிவரசு, மாவட்ட சுகாதார அதிகாரி பாலுசாமி உள்ளிட்டோர் பங்கேற்றனர். புதிய நகர்ப்புற சுகாதார நிலையத்தில், 24 மணி நேரமும் மருத்துவ வசதி, ஸ்கேன், எக்ஸ்ரே, ரத்தப் பரிசோதனை மையம், மருந்தகம், கர்ப்பிணி பெண்களுக்கு பிரத்யேக சிகிச்சை, கழிப்பிட வசதி ஆகியவை உள்ளன. மேலும், முதல் தளத்தில் நோயாளிகள் தங்கி சிகிச்சை பெற படுக்கை வசதிகள் செய்யப்பட்டுள்ளன.