சென்னை: தவெக தலைவர் விஜயின் மகளிர் சார்ந்த வாக்குறுதிகளுக்கு நாம் தமிழர் கட்சி ஒருங்கிணைப்பாளர் சீமான் எதிர்ப்பு தெரிவித்துள்ளார்.

சென்னையில் நிருபர்கள் சந்திப்பில் சீமான் கூறியதாவது: தவெக மகளிர் சார்ந்த அறிவிப்புகள். இது போன்ற முறையை நான் வெறுக்கிறேன், அருவருக்கிறேன். இது வந்து ஒரு ஆட்சியே கிடையாது. இது ஒரு வியாபாரம். மக்களுக்கு ஒன்று வாங்கினால், ஒன்று இலவசம் என்று சொல்வோம் என்கிற மாதிரி திட்டம் ஆடி தள்ளுபடி மாதிரி. ஏற்கனவே 10.5 லட்சம் கோடி ரூபாய் கடன் இருக்கிறது.



ஒரு லட்சம் கோடி ரூபாய் வட்டி இருக்கிறது. இப்படியே வாங்கி, வாங்கி தாலிக்கு தங்கம் இலவசம், இது இலவசம், இது இலவசம் என்று சொல்லிக்கொண்டே போனால் கடைசியாக நாடு வந்து ஒரு நாள் ஏலத்திற்கு வரும். மதுவை ஒழிப்பேன் என்று சொல்ல முடியவில்லை, மதுவை ஒழிக்காமல் சட்டம் ஒழுங்கு என்பது வெட்டி பேச்சு அது ஏமாற்றுப் பேச்சு. விஜய்க்கு தனித்த தத்துவமோ, கோட்பாடோ, பாதையோ கிடையாது. மகளிருக்கு 2,500 ரூபாய் கொடுப்பதாக கூறியது திரைப்பட காமெடி போல 'FLOP 'ஆகும்.


சினிமா வேறு, சித்தாந்தம் வேறு; இரண்டையும் குழப்பிக் கொள்ளக் கூடாது. இலவசம் என்றால் எந்த பொருள் பொறுப்பற்று போய்விடும். பொருளின் அருமை கிடையாது. தாய்பாலும், தண்ணீரும் மலிவாக கிடைப்பதால் நீ மதிக்க மறுக்கிறாய். பூமி காலுக்கு கீழ் மிதிப்படுவதால் மதிப்பதில்லை. அறிவை வளர்க்கும் கல்வியும், உயிரை காக்கும் மருத்துவமும் தான் எல்லோருக்கும் சமமாக கிடைக்கும் வகையில் இலவசமாக இருக்க வேண்டும். இவ்வாறு சீமான் கூறினார்.