வேங்கடமங்கலம்: வேங்கடமங்கலம் ஊராட்சியில், தபால் அலுவலகம் அமைக்க பகுதி மக்கள் வலியுறுத்தி வருகின்றனர்.

வண்டலுார் தாலுகாவிற்கு உட்பட்ட வேங்கடமங்கலம் ஊராட்சியில் தபால் அலுவலகம் இல்லாததால், பகுதி மக்கள் ௨ கி.மீ., துாரம் பயணித்து, அருகிலுள்ள தபால் நிலையங்களுக்கு சென்று வருகின்றனர்.

பொது மக்கள் கூறியதாவது:

வேங்கடமங்கலம் அருகேயுள்ள மேலக்கோட்டையூரில் தபால் அலுவலகம் செயல்பாட்டில் உள்ளது. இதனால், பெண்கள், முதியோர் ௨ கி.மீ., துாரம் செல்கின்றனர்.

எனவே, வேங்கடமங்கலத்தில் தபால் நிலையம் அல்லது துணை தபால் அலுவலகம் அமைக்க வேண்டும் என, கடந்த 20 ஆண்டிற்கும் மேலாக கோரிக்கை விடுத்தும் நடவடிக்கை இல்லை.

சம்பந்தப்பட்ட துறை அதிகாரிகள், நேரில் ஆய்வு செய்து, வேங்கடமங்கலம் ஊராட்சியில் தபால் அலுவலகம் அல்லது துணை தபால் அலுவலகம் அமைக்க நடவடிக்கை எடுக்க வேண்டும்.

இவ்வாறு அவர்கள் கூறினர்.