திருச்சி: மத்திய சிறை சிறப்பு முகாமில் உள்ளவர்களுக்கு, உணவு பார்சலில் கஞ்சா விநியோகம் செய்யப்பட்ட சம்பவம் அதிர்ச்சியை ஏற்படுத்தியது.

திருச்சி மத்திய சிறை சிறப்பு முகாமில், குற்றச் செயல்களில் ஈடுபட்ட வெளிநாட்டினர், குறிப்பாக, இலங்கையைச் சேர்ந்தவர்கள் தங்க வைக்கப்பட்டுள்ளனர்.

நேற்று முன்தினம் இரவு, இச்சிறப்பு முகாமில் ஜெகன், 28, என்பவர் உணவு 'ஆர்டர்' செய்ததாக, ஒருவர் சிறப்பு முகாம் வாசலில் உள்ள சிறைத்துறை போலீசாரிடம், பார்சல் ஒன்றை கொடுத்துள்ளார்.

அந்த பார்சலில், 10க்கும் மேற்பட்ட கஞ்சா பொட்டலங்கள் இருந்துள்ளன. ஜெகனிடம் விசாரித்தபோது, அந்த பார்சல், அதே முகாமில் உள்ள இலங்கையைச் சேர்ந்த டிரோசன், 27, என்பவர் ஆர்டர் கொடுத்தது என தெரிந்தது.

டிரோசன், ஜெகன், பார்சலை கொண்டு வந்து கொடுத்த நபர் ஆகியோரிடம் தீவிர விசாரணை நடக்கிறது. உணவு பார்சல் மூலம், சிறப்பு முகாம்வாசிகளுக்கு கஞ்சா சப்ளை செய்தது வெளிச்சத்துக்கு வந்துள்ளது. இது, போலீசாரை அதிர்ச்சியில் ஆழ்த்தியுள்ளது.