தமிழகத்திற்கு வரும் சுற்றுலாப் பயணியர் எண்ணிக்கை, ஆண்டுதோறும் அதிகரித்து வருகிறது. ஆனால், அத்துறை மேம்படுத்தப்படவில்லை. அத்துறையை மேம்படுத்த, தி.மு.க., அரசு கடந்த ஐந்து ஆண்டுகளாக பல்வேறு அறிவிப்புகளை வெளியிட்டது. அவற்றில் பல செயல்பாட்டிற்கு வரவில்லை.

அவற்றின் விபரம்:

* மதுரை - ராமேஸ்வரம் - கொடைக்கானல் இடையே, ஹெலிகாப்டர் சுற்றுலா தொடங்கப்படும்

* தமிழக சுற்றுலா வளர்ச்சிக் கழக தங்கும் விடுதிகளை, இணையதள பயண நிறுவனங்களின் இணையதளத்தில் இடம்பெறச் செய்து பிரபலப்படுத்தி, அதன் வருவாய் அதிகரிக்கப்படும்

* ராமேஸ்வரம் - கன்னியாகுமரி இடையே, சொகுசு கப்பல் சேவை, படகு சேவை தொடங்கப்படும்

* சுற்றுலா தலங்கள், மலைவாச தலங்கள் மற்றும் ஆன்மிக தலங்களை இணைப்பதற்கு, கேபிள் கார் வசதி ஏற்படுத்தப்படும்

* மாமல்லபுரம், முதலியார் குப்பம், மனோரா, அரியமான், முட்டம் கடற்கரைகளுக்கு, நீலக்கொடி அங்கீகாரம் பெற நடவடிக்கை எடுக்கப்படும்

* காபி, தேயிலை, ரப்பர், நறுமணப் பொருட்கள் அதிகளவில் விளையும் ஊட்டி, கொடைக்கானல், மேகமலை, கன்னியாகுமரி ஆகிய இடங்களில், தோட்டக்கலைப் பயிர் சுற்றுலா ஏற்படுத்தப்படும். சுற்றுலாப் பயணியர், பண்ணை தோட்டங்களில் உள்ள விவசாயிகளுடன் கலந்துரையாட ஏற்பாடு செய்யப்படும்

* வெளிநாட்டினர் ஆயுஷ் மருத்துவ சேவையை பெறுவதற்கு அதிகளவில் வருவதால், மருத்துவ சுற்றுலா மேம்படுத்தப்படும்

* நீர் விளையாட்டுகள், சாகச விளையாட்டுகள், தங்கும் வசதியுடன் கூடிய கேரவன் இயக்குவோர் மற்றும் திறந்தவெளி முகாம்கள் நடத்துவோருக்கான, வழிகாட்டி நெறிமுறைகள் வெளியிடப்படும்

* உலகின் இரண்டாவது நீளமான மெரினா கடற்கரையில், ராயல் மெட்ராஸ் யாட் கிளப்புடன் இணைந்து, மோட்டார் படகுகள், அதிவிரைவு படகுகள் மற்றும் பொழுதுபோக்கு படகு சவாரி தொடங்கப்படும்

* பொன்விழா கொண்டாடும் தமிழ்நாடு சுற்றுலா வளர்ச்சி கழகம், மறுசீரமைப்பு செய்யப்பட்டு லாபம் ஈட்ட நடவடிக்கை எடுக்கப்படும்

* பழமையான கோவில்களில், முப்பரிமாண லேசர் தொழில்நுட்பத்துடன் கூடிய ஒலி - ஒளி காட்சி, பொது மற்றும் தனியார் பங்களிப்புடன் மேற்கொள்ளப்படும்

* பூண்டி ஏரியில் நீர் விளையாட்டுகள், படகு சவாரி, சாகச விளையாட்டுகள் மற்றும் பறவைகளை காண பார்வையாளர் மாடம் அமைக்கப்பட்டு, சுற்றுலா தலமாக மேம்படுத்தப்படும்

* துாத்துக்குடி கடற்கரையில் நீர் விளையாட்டுகள், கடற்கரை விளையாட்டுகள் போன்ற வசதிகள் அமைத்து, சுற்றுலா தலமாக மேம்படுத்தப்படும்

* திருநெல்வேலி மாவட்டத்தில் உள்ள மணிமுத்தாறு அணை, சாகச சுற்றுலா தலமாக மேம்படுத்தப்படும்

* காஞ்சிபுரம், திருவண்ணாமலை, நாகப்பட்டினம், கரூர், மதுரை போன்ற மாவட்டங்களில், சமண, புத்த மதங்களைச் சேர்ந்த புகழ்பெற்ற தலங்களை சுற்றுலாப் பயணியர் கண்டுகளிக்க, உலகத்தரத்திலான சுற்றுலா வசதிகள் தனியார் பங்களிப்புடன் மேம்படுத்தப்படும்

* சுற்றுலாத் துறைசார் தொழில் நிறுவனங்களை ஊக்குவிக்கும் வகையில், தமிழ்நாடு சுற்றுலா ஊக்குவிப்பு வசதி சட்டம், தமிழக அரசால் கொண்டு வரப்படும்

* சுற்றுலாத் துறையில், தனியார் முதலீட்டை ஊக்குவிக்கும் வகையில், மாமல்லபுரம் - மரக்காணம் கடலோர சுற்றுலா வழித்தடம்; திருச்சி - தஞ்சாவூர் - நாகை சோழர்கால சுற்றுலா வழித்தடம்; மதுரை - சிவகங்கை மரபுசார் சுற்றுலா வழித்தடம், கோவை - பொள்ளாச்சி இயற்கை நலன் சுற்றுலா வழித்தடம் அமைக்கப்படும்.