- நமது நிருபர் -

சட்டசபை தேர்தலில், அ.தி.மு.க., - பா.ஜ., கூட்டணிக்கு, நடிகர்கள் ரஜினி மற்றும் அஜித் ரசிகர்கள் ஆதரவு அளித்து, தீர்மானம் நிறைவேற்றி வருவது, தி.மு.க., தலைமையிடம் அதிர்ச்சியை ஏற்படுத்தியுள்ளது.

விஜயின் த.வெ.க., வரவுக்கு பின், அ.தி.மு.க., - பா.ஜ., கூட்டணி சார்பில், அக்கட்சி நிர்வாகிகள், ரஜினி மற்றும் அஜித் ரசிகர்களின் ஓட்டுகளைப் பெற வியூகம் அமைத்து, அதை செயல்படுத்தி வருகின்றனர்.

ஒவ்வொரு தொகுதியிலும், தே.ஜ., கூட்டணி வேட்பாளர்கள், ரஜினி, அஜித் ரசிகர்களை சந்தித்து, ஆதரவு திரட்டி வருகின்றனர்.

அ.தி.மு.க., பொதுச்செயலர் பழனிசாமியின் தேர்தல் பிரசாரத்தில், அஜித் ரசிகர்கள், அவருக்கு அஜித் படங்களை பரிசாக வழங்கி வருகின்றனர்.

சென்னை, கோவை, திருப்பூர், நாகர்கோவில், சிவகாசி போன்ற இடங்களில், சில தொகுதிகளில் அஜித், பழனிசாமி ஆகியோர் இருக்கும் படங்களை, ரசிகர்கள் வழங்கினர்.

அஜித்தை பொருத்தவரை, தன் ரசிகர்கள் தனிப்பட்ட முறையில், யாருக்கும் ஓட்டளிக்கலாம் என சுதந்திரம் வழங்கி உள்ளார். அவரது ரசிகர்களில் பெரும்பாலானோர், த.வெ.க., எதிர்ப்பு மனநிலையில் உள்ளனர்.

எனவே, அ.தி.மு.க., - பா.ஜ.,வினர், அவர்களின் ஓட்டுகளை வளைத்து வருகின்றனர். இதைத் தொடர்ந்து, தி.மு.க., வேட்பாளர்களும், அஜித் ரசிகர்களை சந்தித்து, ஆதரவு திரட்ட தொடங்கி உள்ளனர்.

அதேபோல் ரஜினி ரசிகர்களின் ஓட்டுகளையும், அ.தி.மு.க., - பா.ஜ., அணி தரப்பு தங்கள் பக்கம் இழுத்து வருகிறது.

சேலம் மாவட்ட ரஜினி ரசிகர் மன்ற மாவட்ட நிர்வாகி ஒருவர், அ.தி.மு.க., கூட்டணிக்கு முழு ஆதரவு அளித்துள்ளார். சேலம் மாவட்டத்தில் அ.தி.மு.க., வேட்பாளர்களுக்கு பிரசாரம் செய்யப்போவதாக அறிவித்துள்ளார்.

அதேபோல் கோவை, சிவகாசி, துாத்துக்குடி மாவட்ட அ.தி.மு.க., முன்னாள் அமைச்சர்கள், ரஜினி ரசிகர் மன்ற நிர்வாகிகளை சந்தித்து, ஆதரவு கேட்டுள்ளனர்.

சமீபத்தில், த.வெ.க., மாநில நிர்வாகி ஆதவ் அர்ஜுனா, ரஜினி குறித்து பேசியது, அவரது ரசிகர்களிடம் அதிருப்தியை ஏற்படுத்தியுள்ளது.

எனவே, த.வெ.க., விற்கு எதிராக பிரசாரம் செய்து வருகின்றனர். அத்துடன் ரஜினியின் ஆதரவை பெறவும், பா.ஜ., தரப்பில் முயற்சி நடந்து வருகிறது. இது, தி.மு.க.,வை அதிர்ச்சியடைய வைத்து உள்ளது.