தஞ்சாவூர்: லேசர் ஹாலோகிராபி தொழில்நுட்பம் பயன்படுத்தி, விஜய் நேரில் வந்து பேசுவது போல் பிரசாரம் செய்கிறார் தஞ்சை தவெக வேட்பாளர்.


ஒவ்வொரு தொகுதிகளிலும் போட்டியிடும் வேட்பாளர்கள் பல்வேறு நூதன உத்திகளை கையாண்டு வருகின்றனர். அதேபோல, அரசியல் கட்சிகளின் தலைவர்களும், புதுப்புது உத்திகளை பயன்படுத்துகின்றனர்.

புதிதாக களத்துக்கு வந்துள்ள விஜய் கட்சிக்கு, பிரசாரம் செய்வதில் நிறைய சிக்கல்கள் ஏற்படுகின்றன. ்பிரசாரத்துக்கு அனுமதி பெறுவது, அனுமதி கிடைத்தாலும் கிளம்பி வருவது, வந்தாலும், தாமதமாக வருவது, பேசாமலேயே சென்று விடுவது என விஜய் கட்சி வேட்பாளர்கள் சந்திக்கும் பிரச்னைகள் ஏராளம்.

இதனால் விஜய் போல பொம்மை பயன்படுத்தியும், கலைஞர்களுக்கு விஜய் போல வேடமிட்டும் , விஜய் போன்ற முக மாஸ்க் அணிந்தும் சில வேட்பாளர்கள் நூதன முறையை கையாண்டு வருகின்றனர்.



அந்த வகையில், தஞ்சாவூர் மாவட்டம் கும்பகோணம் தொகுதியில் தமிழக வெற்றி கழகம் சார்பில் போட்டியிடும் வேட்பாளர் வினோத் ரவி, ஹாலோகிராபி தொழில்நுட்பம் மூலம், தனது பக்கத்தில் விஜய் நின்று பேசி ஓட்டு கேட்பது போன்று செய்துள்ளார். இந்த தொழில்நுட்பம், தமிழக தேர்தலுக்கு இப்போது தான் அறிமுகம் ஆகியிருப்பதாக கூறுகின்றனர் அவரது கட்சி நிர்வாகிகள்.
சற்று தொலைவில் இருந்து பார்க்கும் அனைவருக்கும் விஜய் நேரில் வந்து பிரசாரம் செய்வது போலவே இருக்கிறது. வேட்பாளரின் இந்த நுாதன முயற்சியை, தவெகவின் பிற வேட்பாளர்களும் பயன்படுத்துவது பற்றி ஆர்வத்துடன் விசாரித்து வருகின்றனர்.