சிங்கம்புணரி:சிங்கம்புணரி, எஸ்.புதுார் ஒன்றியங்களில் மீண்டும் மின்வெட்டு துவங்கியுள்ள நிலையில் மக்கள் கடும் அவதிக்கு ஆளாகி வருகின்றனர்.

இவ்வொன்றியங்களில் கடந்த ஒருவாரமாக பகல், இரவு நேரங்களில் அடிக்கடி மின்தடை ஏற்படுகிறது. சிங்கம்புணரி பகுதியில் இரவு நேரங்களில் ஒரு மணி நேரம் வரை மின்தடை ஏற்படுவதால் மக்கள் அவதிப்படுகின்றனர். எஸ்.புதுார் ஒன்றியத்தில் பல கிராமங்களில் குறைந்தழுத்த மின் சப்ளையே வருகிறது.

கடந்த இரண்டு நாட்களாக 20 முறை வரை மின்தடை ஏற்படுகிறது. பிரான்மலை பகுதியிலும் குறைந்தழுத்த மின்சாரத்தால் பம்புசெட் ஓடாமல், கோடை சாகுபடி செய்துள்ள விவசாயிகள் அவதிப்படுகின்றனர். ஏற்கனவே கோடை வெப்பத்தின் தாக்கத்தால் மக்கள் அவதிப்படும் நிலையில் மின்சாரம் இல்லாததால் மேலும் அவதிக்கு ஆளாகின்றனர். மின்மோட்டார்களை இயக்க முடியாமலும், குடிநீர் கிடைக்காமலும் பாதிப்பு ஏற்படுகிறது. தேர்தல் நேரத்தில் அடிக்கடி மின்தடை ஏற்படுவதால் தி.மு.க.,வினர் கலக்கத்தில் உள்ளனர்.