புதுடில்லி: 'ஏசி', பிரிஜ், வாஷிங் மெஷின், டிவி, மொபைல் போன்' ஆகியவற்றின் விலையை இம்மாத இறுதியில் உயர்த்த பல்வேறு நிறுவனங்கள் திட்டமிட்டுள்ளன.

கடந்த நான்கு மாதங்களில் இப்பொருட்களின் விலை உயர்த்தப்படுவது 3வது முறை ஆகும். மெமரி சிப், கச்சா எண்ணெயிலிருந்து பெறப்படும் பிளாஸ்டிக் முதலிய மூலப்பொருட்களின் விலை அதிகரித்ததை அடுத்து, இந்த விலை உயர்வு நடைமுறைக்கு வருகிறது.

சில மாதங்களுக்கு முன்பு, பல்வேறு நுகர்வு பொருட்களுக்கு ஜி.எஸ்.டி., குறைக்கப்பட்டது. இதையடுத்து, வீட்டு உபயோக பொருட்களுக்கான தேவை அதிகரித்தது.

இந்நிலையில், மூலப்பொருள் விலை உயர்வு, ரூபாய் மதிப்பு வீழ்ச்சி, 'ஏசி'க்கான மின் சேமிப்பு விதிகளில் மாற்றம் ஆகியவற்றால் ஜன., இறுதி முதல் பிப்., வரையிலான காலகட்டத்தில் இவற்றின் விலை அதிகரித்து விட்டது.

மார்ச் இறுதி பகுதி முதல் ஏப்ரல் துவக்கம் வரையிலான காலகட்டத்தில் சரக்கு போக்குவரத்து கட்டண உயர்வு, ரூபாய் மதிப்பு வீழ்ச்சி, கச்சா எண்ணெய் தொடர்புடைய மூலப்பொருட்களின் விலையேற்றம் ஆகியவற்றின் எதிரொலியாக இரண்டாவது சுற்று விலை உயர்வு நடைமுறைக்கு வந்தது.