விழுப்புரம்: விழுப்புரம் தொகுதி தி.மு.க., வேட்பாளர் லட்சுமணன் எம்.எல்.ஏ., கூறியதாவது: விழுப்புரம் மக்களின் ஆசியோடு மீண்டும் போட்டியிடுகிறேன். உங்கள் ஆதரவுடன் வெற்றி பெற்றவுடன், முதல்வர் ஸ்டாலின் அறிவித்த விஷன் 2030 திட்டத்தில், நமது விழுப்புரம் தொகுதியில் என் ஊர் எப்படி இருக்க வேண்டும் என்ற கனவு திட்டத்தை செயல்படுத்துவேன்.

குறிப்பாக, விழுப்புரம் நகரில் அடிப்படை பிரச்னைகள் தீர்க்கப்படும். மீதமுள்ள 20 சதவீதம் பாதாள சாக்கடை திட்டத்தை முடித்து கிளீன் அன்டு ஹெல்தி டவுனாக மாற்றப்படும்.தொகுதியில் உள்ள ஏரி, குளங்கள் அனைத்தும் புனரமைக்கப்படும். மருதுார் ஏரியை புனரமைத்து, சுற்றுலாத்தளமாக்கி, படகு குழாம், நடை பயிற்சி பாதை, சிறுவர் பூங்கா, உருவாக்கப்படும். கடந்த 5 ஆண்டுகளில், பல திட்டங்களை கொண்டுவந்துள்ளேன்.

குறிப்பாக, விழுப்புரத்தில் ரூ.3 கோடியில் மீன் மார்க்கெட், 2.50 கோடியில் அறிவுசார் மைய நுாலகம், ரூ.2.18 கோடியில் ஐயனார்குளம் சீரமைப்பு, ரூ.5 கோடியில் எல்.இ.டி. தெருமின் விளக்குகள், ரூ.1.36 கோடியில் நாயக்கன் தோப்பில் வணிக வளாகம், ரூ.2.50 கோடியில் விளையாட்டு திடலுடன் பூங்கா, பாண்டியன் நகரில் ரூ.2.50 கோடியில் பூங்கா, ரூ.3.78 கோடியில் தொழிலாளர் நலவாரிய அலுவலகம், ரூ.6.50 கோடியில் அருங்காட்சியகம், தளவானுாரில் ரூ.86 கோடியில் அணைக்கட்டு, ரூ.5 கோடியில் சாலாமேடில் குடிநீர் திட்டப்பணிகள் நடந்துள்ளது.

ரூ.4.70 கோடியில் தியாகி கோவிந்தசாமி மணிமண்டபம் மகாராஜபுரத்தில் ரூ.1.78 கோடியில் மின் தகனமையம், அரசு மகளிர் பள்ளி ரூ.4.69 கோடியில் தகைசால் பள்ளியாக தரம் உயர்ந்துள்ளது. மேலும், திட்டங்கள் தொடர தனக்கு வாய்ப்பளிக்க வேண்டும் என்றார்.