கடலுார்: கடலுார் அரசு பெரியார் கல்லுாரி ஓட்டு எண்ணிக்கை மையத்தில் வேட்பாளர்கள் மொபைல் கொண்டு செல்ல போலீசார் தடை விதித்துள்ளனர். 

கடலுார் மற்றும் குறிஞ்சிப்பாடி தொகுதிகளின் மின்னணு ஓட்டுப்பதிவு இயந்திரங்கள் ஓட்டு எண்ணிக்கை மையமான கடலுார் அரசு பெரியார் கல்லுாரியில் உள்ள பாதுகாப்பு அறையில் வைக்கப்பட்டுள்ளது. இங்கு, மூன்றடுக்கு போலீஸ் பாதுகாப்பு போடப்பட்டுள்ளது. 

கண்காணிப்பு கோபுரம் அமைத்து போலீசார் பாதுகாப்பு பணியில் ஈடுபட்டுள்ளனர். இதற்கிடையில், ‘ஸ்ட்ராங் ரூமில்’ வைக்கப்பட்டுள்ள ஓட்டுப்பதிவு இயந்திரங்களை ‘சி.சி.டி.வி.,’ கேமரா வழியாக பார்வையிட வரும் வேட்பாளர்கள் மற்றும் அவர்களின் முகவர்கள், பாதுகாப்பு நடவடிக்கையாக மொபைல் போன்களை உள்ளே கொண்டு செல்லக் கூடாது என, போலீசார் நேற்று முதல் தடை விதித்துள்ளனர்.

மொபைல் போன்களை பாதுகாப்பு பணியில் ஈடுபட்டுள்ள போலீசாரிடம் ஒப்படைத்து செல்ல அறிவுறுத்தப்பட்டுள்ளது.