சென்னை: சென்னையில் முதல்வர் விஜய் அறையில் ரீல்ஸ் வீடியோ எடுத்து வெளியிடப்பட்டு இருப்பது பெரும் அதிருப்தியையும், விமர்சனங்களுக்கும் வழிவகுத்துள்ளது.

முதல்வராக பொறுப்பேற்றுள்ள விஜய்,நாள்தோறும் துறை வாரியாக ஆய்வுக் கூட்டங்களை நடத்தி வருகிறார். மேலும் பல்வேறு சங்க நிர்வாகிகளும் தினமும் அவரை சந்தித்து வருகின்றனர். அந்த வகையில் தமிழ்நாடு மாற்றுத்திறனாளிகளுக்கான பல்வேறு சங்கங்களின் கூட்டமைப்பினர் முதல்வர் விஜயை தலைமை செயலகத்தில் சந்தித்து பேசினர்.

மாற்றுத்திறனாளிகளின் தற்போதைய நிலை, தேவைகள் குறித்து அவர்கள் முதல்வர் விஜயிடம் விரிவாக எடுத்துரைத்துக் கொண்டு இருந்தனர். இந்த சந்திப்பில் மாற்றுத் திறனாளிகளுக்கான தமிழ்நாடு மாநில ஆலோசனைக்குழு உறுப்பினர் சுனிதா சதாசிவம், தண்டுவட பாதிப்படைந்தோர் சங்க நிறுவனர் ஞானபாரதி மற்றும் தமிழ்நாடு மாற்றுத் திறனாளிகள் சங்க கூட்டமைப்பின் தலைவர் சிம்மசந்திரன், ஐஐடியின் சென்னை அணுகல் தன்மை ஆய்வு மையத்தின் முதன்மை ஆய்வாளர் பேராசிரியர் ஹேமச்சந்திரன் உள்ளிட்ட பலர் இடம்பெற்று இருந்தனர்.

மாற்றுத்திறனாளிகளுடன் இந்த சந்திப்பின் போது ஒரு வீடியோ எடுக்கப்பட்டு இருந்தது. இந்த வீடியோ இப்போது ரீல்ஸ் ஆக மாறி இணையத்தில் வெளியாகி உள்ளது. இந்த வீடியோவை முதலில் தமிழக அரசு அதிகாரி ஒருவர் தான் எடுத்து வெளியிட்டதாக செய்திகள் பரவின.

ஆனால், இந்த வீடியோவை எடுத்தது அரசு அதிகாரி அல்ல. சந்திப்பின் போது உடன் இருந்த தமிழ்நாடு மாற்றுத்திறனாளிகள் சங்க கூட்டமைப்பைச் சேர்ந்த சிம்மச்சந்திரன் என்பவர் தான் செல்போனில் வீடியோவாக பதிவு செய்து வெளியிட்டுள்ள விவரம் பின்னர் வெளியானது.

ஏற்கனவே திமுக தரப்பில், விஜயின் ஆட்சி இன்ஸ்டா ரீல்ஸ் ஆட்சி என்று கடுமையாக விமர்சிக்கப்பட்டு வரும் சூழலில், முதல்வர் அறையிலேயே ரீல்ஸ் எடுத்து வெளியிட்டுள்ளது, பேசுபொருளாக மாறி இருக்கிறது.