மதுரை: மதுரை சித்திரை திருவிழாவில் ஏற்பட்ட தகராறில் தாக்கியதற்கு பழிக்குப்பழியாக 17 வயது சிறுவன், மீனாட்சி கோயில் 'பார்க்கிங்'கில் கொடூரமாக வெட்டிக் கொலை செய்யப்பட்டார்.

மதுரை வடக்குமாசிவீதியைச் சேர்ந்தவர் குபேந்திரன் என்ற குப்பை 17. நேற்றுமுன்தினம் இரவு மீனாட்சி கோயில் மல்டி லெவல் 'பார்க்கிங்'கில் தலை, முதுகு, முகம் உட்பட 23 இடங்களில் வெட்டுக்காயங்களுடன் கொலை செய்யப்பட்டு கிடந்தார். குடல் வெளியே கிடந்தது. இதுதொடர்பாக திடீர்நகர் முத்துமணி 28, அவரது தம்பி ராஜ் 26, மேலவாசல் சதீஷ்குமார் 28, வடக்குமாசிவீதி ஹரிகிருஷ்ணன் 18, திடீர்நகர் முத்துக்குமார் 19, ஆகியோரை விளக்குத்துாண் போலீசார் கைது செய்தனர்.

போலீசார் கூறியதாவது: மதுரை சித்திரை திருவிழா ஊர்வலத்தின்போது எதிர்பாராதவிதமாக குபேந்திரனுக்கும், முத்துமணிக்கும் வாய்த்தகராறு ஏற்பட்டது. ஆத்திரமுற்ற குபேந்திரன், பாட்டிலால் முத்துமணியின் காதில் குத்தி காயம் ஏற்படுத்தினார். இதுதொடர்பாக திலகர்திடல் போலீசார் குபேந்திரனை கைது செய்தனர். காயம் ஆறுவதற்குள் குபேந்திரனை பழிதீர்க்க வேண்டும் என முத்துமணி சபதம் செய்தார்.

நேற்றுமுன்தினம் இரவு மீனாட்சி கோயில் மல்டி லெவல் 'பார்க்கிங்'கின் முதல் தளத்தில் குபேந்திரன் இருப்பதை அறிந்து முத்துமணி தனது கூட்டாளிகளுடன் சென்று பழிக்குப்பழியாக வெட்டிக்கொலை செய்துவிட்டு, தரைதளத்தில் உடலை வீசிவிட்டு தப்பிச்சென்றனர். குபேந்திரன் தரப்பினர், நேற்று காலை யானைக்கல் பகுதியில் முத்துமணி தாயார் நடத்தும் பழக்கடையை சேதப்படுத்தினர். விசாரணை நடக்கிறது என்றனர்.