சென்னை: சென்னை மின்வாரியத்தில் 10 ஹார்ட் டிஸ்க்குகளை காணவில்லை என புகார் அளிக்கப்பட்டு உள்ளது.

சென்னை அண்ணாசாலையில் மின்வாரிய தலைமை அலுவலகம் உள்ளது. இங்கு 10க்கும் மேற்பட்ட ஹார்ட் டிஸ்க்குகளை காணவில்லை என புகார் அளிக்கப்பட்டு உள்ளது. காணாமல் போனதில் நிலக்கரி கொள்முதல் தொடர்பான தகவல்கள் அடங்கியவை இருந்திருக்கலாம் என சந்தேகம் எழுந்துள்ளது.

இது குறித்து அமைச்சர் நிர்மல் குமார் இன்று நிருபர்களிடம் கூறியதாவது: மின்வாரியத்தில் எத்தனை ஹார்ட் டிஸ்க் திருடப்பட்டது என்று விசாரணை நடக்கிறது. அதிகாரிகள் சஸ்பெண்ட் செய்யப்பட்ட பிறகு தான் திருட்டு நடந்துள்ளது. முறைகேடு விசாரணை தொடங்கிய பிறகே திருட்டு நடந்துள்ளன. ஒப்பந்த தொழிலாளர் பணி நியமனம் தொடர்பான ஹார்ட் டிஸ்க்கும் காணவில்லை. மின்சாரத் துறையில் முக்கியமான ஹார் டிஸ்க்குகள் திருடப்பட்டுள்ளன.

இது குறித்து தீவிர விசாரணை நடந்து வருகிறது. விசாரணைக்கு பிறகு காரணம் தெரியவரும். செந்தில்பாலாஜி அமைச்சராக இருந்த காலக்கட்டத்தில் நடந்த டிரான்ஸ்பார்மர் முறைகேடுகள் குறித்து ஆவணங்கள் சிபிஐயிடம் கொடுக்கப்பட்டது. ஹார்ட் டிஸ்க் காணாமல் போன விவகாரத்தில் மின்வாரிய அதிகாரிகளுக்கு தொடர்பு உள்ளது. இவ்வாறு நிர்மல்குமார் கூறினார்.

இதனிடையே, இது தொடர்பாக உதவி பொறியாளர் மலர்விழி அளித்த புகாரின் பேரில் ஒப்பந்த ஊழியரை போலீசார் கைது செய்தனர்.


யாருக்காக ஹார்ட் டிஸ்க்குகளை அவர் திருடினார் என்றும், அவருக்கு பணம் கொடுத்தது யார்? என்பது பற்றியும் போலீசார் விசாரித்து வருகின்றனர்.

இந்த நிலையில், ஹார்ட் டிஸ்க்குகள் காணாமல் போன நிலையில், எஞ்சியுள்ள ஆவணங்களை பத்திரப்படுத்துவது தொடர்பாக அமைச்சர் நிர்மல்குமார் தலைமையில் ஆலோசனை நடத்தினார். இந்தக் கூட்டத்தில் மின்வாரியத்தின் உயரதிகாரிகள் கலந்து கொண்டனர். அப்போது, மின்வாரிய கோப்புகளை பத்திரப்படுத்துவதில் கூடுதல் கவனம் செலுத்துமாறு அவர் அதிகாரிகளுக்கு அறிவுறுத்தினார்.

தினமலர் நேரலை; வீடியோ பாருங்கள்!

அமைச்சர் நிர்மல்குமார் பகீர் பேட்டி; தினமலர் வெப்சைட் மற்றும் யூடியூப் சேனலில் நேரலை ஒளிபரப்பு

முழு பேட்டியை பார்க்க இங்கே கிளிக் செய்யவும்