சென்னை: பாஜ முன்னாள் மாநில தலைவர் அண்ணாமலையின் ராஜினாமாவை பாஜ தலைமை ஏற்றுக் கொண்டுள்ளது. இதனை பாஜ தேசிய தலைவர் நிதின் நபின் உறுதி செய்துள்ளார்.
தமிழக வெற்றிக் கழகத்தை ஆரம்பித்த, இரு ஆண்டுகளிலேயே, விஜய் ஆட்சியை பிடித்து முதல்வராகியுள்ளார். அதை பின்பற்றி தமிழக அரசியலில், புதிய பாதையில் பயணிக்க, அண்ணாமலை முடிவு செய்துள்ளார். இது குறித்த விபரத்தை, பா.ஜ., தலைமைக்கு தெரிவித்து, கட்சியிலிருந்து விலகுவதற்காக, கடந்த 1ம் தேதி, டில்லி சென்றார்.


பா.ஜ., தேசிய தலைவர் நிதின் நபின், மத்திய உள்துறை அமைச்சர் அமித் ஷா, தேசிய அமைப்பு பொது செயலர் பி.எல்.சந்தோஷ் ஆகியோரை சந்தித்து, கட்சியில் இருந்து விலகும் முடிவை தெரிவித்தார். தற்போது பாஜ முன்னாள் மாநில தலைவர் அண்ணாமலையின் ராஜினாமாவை பாஜ தலைமை ஏற்றுக் கொண்டுள்ளது. இன்று இரவு 7.30 மணிக்கு அண்ணாமலை சென்னை திரும்புகிறார்.


யார் இந்த அண்ணாமலை?

தமிழகத்தில் கரூர் மாவட்டத்தை சேர்ந்த கே.அண்ணாமலை, கர்நாடகாவில் ஐ.பி.எஸ்., அதிகாரியாக பணியாற்றினார். கர்நாடகாவை சேர்ந்த பா.ஜ.,வின் தேசிய அமைப்பு பொதுச் செயலர் பி.எல்.சந்தோஷ் அழைப்பை ஏற்று, போலீஸ் பதவியை ராஜினாமா செய்து, 2020ல் பா.ஜ.,வில் இணைந்தார்.

2021ல்...

கடந்த, 2021 சட்டசபை தேர்தலின் போது, கரூர் மாவட்டம் அரவக்குறிச்சி தொகுதியில் போட்டியிட்டு தோல்வி அடைந்தார். ஆனாலும், அதே ஆண்டு ஜூலையில், தமிழக பா.ஜ., தலைவராக நியமிக்கப்பட்டார். மாவட்ட வாரியாக சுற்றுப்பயணம் செய்தும், நடைபயணம் சென்றும், பா.ஜ.,வை பலப்படுத்தினார்.

2024ல்...

கடந்த, 2024 லோக்சபா தேர்தலில், அ.தி.மு.க.,வுடன் கூட்டணி அமைக்க, பா.ஜ., மேலிட தலைவர்கள் விரும்பினர். அதற்கு, அண்ணாமலை உடன்படவில்லை. அதனால், பா.ஜ., தனி அணி அமைத்து போட்டியிட்டு தோற்றது; கோவையில் போட்டியிட்ட அண்ணாமலையும் தோல்வியை தழுவினார்.

2025ல்...

சட்டசபை தேர்தலில் கூட்டணி சேர, அ.தி.மு.க., பொதுச்செயலர் இபிஎஸ் வைத்த நிபந்தனை காரணமாக, தமிழக பா.ஜ., தலைவர் பதவியிலிருந்து அண்ணாமலை, 2025 ஏப்ரலில் நீக்கப்பட்டார்; நயினார் நாகேந்திரன், அப்பொறுப்பில் நியமிக்கப்பட்டார்.

2026ல்...

பிறகு கட்சி பணிகளில் பெரிய ஈடுபாடோ, ஆர்வமோ காட்டாமல், அண்ணாமலை ஒதுங்கியே இருந்த நிலையில் தற்போது பாஜவில் இருந்து விலகி உள்ளார்.

தினமலர் நேரலை; வீடியோ பாருங்கள்!

அண்ணாமலை ராஜினாமா ஏற்பு: தினமலர் வெப்சைட் மற்றும் யூடியூப் சேனலில் நேரலை ஒளிபரப்பு

லைவ் வீடியோவை பார்க்க இங்கே கிளிக் செய்யவும்