கடலுார்: கடலுாரில், முதல்வர் விஜயின், 20க்கும் மேற்பட்ட பேனர்கள் மாநகராட்சி ஊழியர்கள் அகற்றினர்.

தமிழக முதல்வர் விஜய் நடித்த 'ஜனநாயகன்' படம் நேற்று வெளியானது. அதையொட்டி கடலுார் மாநகரில், ஜனநாயகன் படத்தை வரவேற்கும் விதமாக த.வெ.க., அமைச்சர் ராஜ்குமாரின் ஆதரவாளர்கள் வைத்திருந்த பேனர்கள் மாநகரம் முழுவதும் வியாபித்திருந்தது.

இந்நிலையில், நேற்று மதியம் மாநகராட்சி கமிஷ்னர் கிஷன் குமார் உத்தரவின்பேரில் கடலுார் ஆல்பேட்டை முதல், அண்ணா மேம்பாலம் வரையிலும், திருப்பாதிரிப்புலியூர் பஸ் நிலையம் தொடங்கி திருவந்திபுரம் வரையில் இருந்த முதல்வர் விஜய், அமைச்சர் ராஜ்குமார் மற்றும் அவரது ஆதரவாளர்களின் படங்கள் இடம் பெற்றிருந்த, பேனர்கள் போலீஸ் பாதுகாப்புடன் அகற்றப்பட்டன. ஆனால், சினிமா தியேட்டர் முன்பு இருந்த பேனர்கள் மட்டும் அகற்றப்படவில்லை. இதையடுத்து அனுமதியில்லாமல் பேனர் வைக்கக்கூடாது என மாநகராட்சி நிர்வாகம் அறிவுறுத்தியுள்ளது.