சென்னை: தமிழகத்தில் வெவ்வேறு ஊர்களில் லஞ்சம் வாங்கிய விமான போக்குவரத்து அதிகாரி, வருவாய் ஆய்வாளர் உள்ளிட்ட மூவர், நேற்று(அக்.,5) கைது செய்யப்பட்டனர்.

ரூ.4,000 லஞ்சம் வாங்கிய சிட்லப்பாக்கம் வருவாய் ஆய்வாளர் கைது

சிட்லப்பாக்கம்: சிட்லப்பாக்கத்தில், பட்டா பெயர் மாற்றத்திற்கு, 4,000 ரூபாய் லஞ்சம் வாங்கிய பிரசாந்த், என்ற வருவாய் ஆய்வாளரை, லஞ்ச ஒழிப்புத் துறையினர் நேற்று கைது செய்தனர்.

தாம்பரம் அடுத்த செம்பாக்கத்தைச் சேர்ந்தவர் மனோஜ்குமார். இவர், தன் நிலத்தை அளவீடு செய்து, பட்டாவில் தவறாக குறிப்பிடப்பட்டுள்ள தந்தையின் பெயரை திருத்தம் செய்யக்கோரி, தாம்பரம் வட்டாச்சியர் அலுவலகத்தில், மனு அளித்திருந்தார். அந்த மனுவை பரிசீலித்து, மேல் நடவடிக்கைக்காக பரிந்துரை செய்வதற்கு, சிட்லபாக்கம் வருவாய் ஆய்வாளரான பிரசாந்த் என்பவர், 4,000 ரூபாய் லஞ்சம் கேட்டுள்ளார். லஞ்சம் தர விரும்பாத மனோஜ்குமார், இதுகுறித்து லஞ்ச ஒழிப்புத் துறை போலீசில் புகாரளித்தார்.

இதையடுத்து போலீசார் கொடுத்த ரசாயனம் தடவிய 4,000 மதிப்புள்ள ரூபாய் நோட்டுகளை, மனோஜ்குமாரிடம் இருந்து வருவாய் ஆய்வாளர் பிரசாந்த், நேற்று வாங்கினார். அப்போது, அங்கு மறைந்திருந்த லஞ்ச ஒழிப்பு துறை போலீசார், பிரசாந்தை கையும் களவுமாக பிடித்து, கைது செய்தனர். அவரிடம், போலீசார் விசாரணை நடத்தி வருகின்றனர்.

ரூ.2.50 லட்சம் லஞ்சம் வாங்கிய விமான போக்குவரத்து அதிகாரி கைது

சென்னை: விமான பயிற்சி மையத்தில் உள்ள குறைபாடுகளை கண்டுகொள்ளாமல் இருக்க, லஞ்சமாக மொபைல் போன் மற்றும் 2.50 லட்சம் ரூபாய் வாங்கிய, சிவில் விமான போக்குவரத்து துறை தலைமை இயக்ககத்தின் துணை இயக்குநர் சுசில்குமார் கர்க், 44, மற்றும் விமான பயிற்சி நிறுவன இயக்குநர் சச்சின் கேசவ் பானே, 40, ஆகியோர், சி.பி.ஐ., அதிகாரிகளால் கைது செய்யப்பட்டனர்.

சென்னை மீனம்பாக்கத்தில், சிவில் விமான போக்குவரத்து தலைமை இயக்ககம் செயல்படுகிறது. இதில், விமான பயிற்சி மையங்களுக்கு உரிமம் வழங்குதல் உள்ளிட்ட பணிகளை கவனித்து வரும், விமான தகுதி நிலை என்ற பிரிவின் துணை இயக்குநராக, சுசில்குமார் கர்க் பணிபுரிகிறார். இவர், விமான பயிற்சி நிறுவனத்தின் இயக்குநரிடம் லஞ்சம் கேட்பதாக, டில்லி சி.பி.ஐ., அதிகாரிகளுக்கு, கடந்த 3ம் தேதி மாலை, 5:00 மணிக்கு புகார் கிடைத்துள்ளது. இதையடுத்து, சுசில்குமார் கர்க் மற்றும் இவரது கூட்டாளிகளின் நடவடிக்கைகளை ரகசியமாக கண்காணித்தனர்.

சி.பி.ஐ., தொடர் விசாரணையில், மஹாராஷ்டிரா மாநிலம், தானே பகுதியில், 'எக்வி ஏர் டிரெய்னிங்' என்ற விமான பயிற்சி நிறுவனம் செயல்பட்டு வருவதும், இந்நிறுவனம், சேலம் மாவட்டம், ஓமலுார் அருகே, காமலாபுரம் என்ற இடத்தில், ஏழு விமானங்களுடன் பயிற்சி மையத்தை நடத்தி வருவதும் தெரியவந்தது. இந்நிறுவனத்தில், கடந்த ஜூலை 31ம் தேதி சுசில்குமார் ஆய்வு செய்துள்ளார். அப்போது, பயிற்சி மையத்தில், விதிகளை பின்பற்றாமல் குறைபாடுகள் இருப்பது தெரியவந்துள்ளது.

இக்குறைபாடுகளை கண்டுகொள்ளாமல் இருக்க, விமான பயிற்சி மையத்தின் இயக்குநர் சச்சின் கேசவ் பானேவிடம், லஞ்சம் கேட்டுள்ளார். தன்னுடன் மற்ற அதிகாரிகளும் இருந்ததால், லஞ்சப் பணத்தை அவரால் பெற முடியவில்லை. அதன்பின், கடந்த, 2ம் தேதி, சச்சின் கேசவ் பானேவுடன் பேச்சு நடத்தி, லஞ்சமாக, 50 ஆயிரம் ரூபாய் மதிப்புள்ள மொபைல் போனையும், அதன்பின், 2.50 லட்சம் ரூபாயையும் வாங்கி உள்ளார் என்பது தெரியவந்தது. இதையடுத்து, சுசில்குமார் கர்க், சச்சின் கேசவ் பானே இருவரையும் நேற்று முன்தினம் இரவு கைது செய்த, சி.பி.ஐ., அதிகாரிகள், டில்லி அழைத்து சென்று விசாரித்து வருகின்றனர்.

ரூ.5 ஆயிரம் லஞ்சம் வாங்கிய சுகாதார அலுவலர் கைது

சிவகாசி: விருதுநகர் மாவட்டம் சிவகாசியில் சுகாதாரத்துறை ஒப்பந்த வாகனத்திற்குரிய வாடகை தொகையை விடுவிக்க ரூ.5 ஆயிரம் லஞ்சம் வாங்கிய மாவட்ட சுகாதார அலுவலர் ஜெகவீரபாண்டியனை லஞ்ச ஒழிப்பு போலீசார் கைது செய்தனர்.

சிவகாசி வெம்பக்கோட்டை அருகே எதிர்கோட்டையைச் சேர்ந்தவர் பாண்டீஸ்வரன் 31. இவரது கார் தாயில்பட்டி அரசு ஆரம்ப சுகாதார நிலையத்தில் தேசிய சுகாதார இயக்கத்தில் குழந்தைகள் பாதுகாப்பு திட்ட நடமாடும் குழுவுக்கு ஒப்பந்த அடிப்படையில் மாத வாடகைக்கு இயக்கப்பட்டு வருகிறது. இந்த வாகனத்திற்கு ஆக., செப்., மாதங்களுக்குரிய வாடகை தொகையை விடுவிக்க சுகாதாரத்துறையின் சிவகாசி மாவட்ட சுகாதார அலுவலர் ஜெகவீரபாண்டியன், ஒரு மாதத்திற்கு ரூ.2,500 வீதம் ரூ.5 ஆயிரம் லஞ்சமாக பாண்டீஸ்வரனிடம் கேட்டார்.

ஆனால் பாண்டீஸ்வரன் லஞ்ச ஒழிப்புத்துறை போலீசாரிடம் தெரிவித்தார். அவர்கள் கொடுத்த அறிவுறுதலின்படி நேற்று மாலை ரசாயனம் தடவிய பணத்தை பாண்டீஸ்வரன் சுகாதார அலுவலர் ஜெகவீரபாண்டியனிடம் கொடுத்தார். அதனை பெற்ற ஜெகவீரபாண்டியனை லஞ்ச ஒழிப்பு டி.எஸ்.பி., ராமசந்திரன், இன்ஸ்பெக்டர் பூமிநாதன் மற்றும் போலீசார் கைது செய்தனர்.