ஆர்.எஸ்.மங்கலம்: ராமநாதபுரம் மாவட்டம் திருப்பாலைக்குடியில் மாலை 6:00 மணிக்கு மேல் வெளியூர் வியாபாரிகள் ஊருக்குள் வரக்கூடாது, என ஐக்கிய முஸ்லிம் சுன்னத்வல் ஜமாத் சார்பில் வைக்கப்பட்ட அறிவிப்பு சர்ச்சையை ஏற்படுத்தியுள்ளது.

கிழக்கு கடற்கரை சாலையில் திருப்பாலைக்குடி அரசு மேல்நிலைப்பள்ளி அருகில் திருப்பாலைக்குடி ஐக்கிய முஸ்லிம் சுன்னத் வல் ஜமாத் சார்பில் பொது இடத்தில் 'வியாபாரிகள் கவனத்திற்கு' என அறிவிப்பு வைக்கப்பட்டுள்ளது. அதில், 'வெளியூர் வியாபாரிகள், கொரியர் சேவை, தண்ணீர் வண்டி ஓட்டுநர்கள் உள்ளிட்ட வியாபாரிகள் காலை 6:00 முதல் மாலை 6:00 மணி வரை மட்டுமே ஊருக்குள் வர வேண்டும். மாலை 6:00 மணிக்குள் ஊரிலிருந்து திரும்பிச் செல்ல வேண்டும்,' என அறிவிக்கப்பட்டுள்ளது.

இந்த அறிவிப்பு சர்ச்சையை ஏற்படுத்தியுள்ளது. கிராமத்திற்குள் வருவதற்கு நேரம் விதிப்பதற்கு ஜமாத்திற்கு அதிகாரம் உள்ளதா என்ற கேள்வி எழுந்துள்ளது.

இதுகுறித்து ஆர்.எஸ்.மங்கலம் தாசில்தார் வரதன் கூறுகையில், ஜமாத் நிர்வாகம் சார்பில், வைக்கப்பட்டுள்ள அறிவிப்பு பலகையை அகற்றுமாறு அறிவுறுத்தி உள்ளோம். தவறும் பட்சத்தில் நாளை (இன்று) அகற்ற நடவடிக்கை எடுக்கப்படும் என்றார்.

சம்பந்தப்பட்ட ஜமாத் தலைவர் அப்துல் குத்துாஸ் கூறுகையில், ஊருக்குள் வரக்கூடாது என்று கட்டளையிட வில்லை. வேண்டுகோள் மட்டுமே விடுத்துள்ளோம். இரவில் நடக்கும் திருட்டு சம்பவங்கள், குழந்தைகள் தெருக்களில் விளையாடும் போது விபத்துக்களை தவிர்க்கவும், பல்வேறு குற்றச் செயல்களை தடுக்கவுமே இந்த அறிவிப்பு பலகையை வைத்துள்ளோம் என்றார்.