- நமது சிறப்பு நிருபர்-
இந்திய உணவு பாதுகாப்புத் துறையில் ஒரு ராக் ஸ்டார் என்று மகாராஷ்டிரா உணவு பாதுகாப்பு ஆணையர் துக்காராம் முண்டேவுக்கு நியூயார்க் டைம்ஸ் நாளிதழ் புகழாரம் சூட்டி, முதல் பக்க கட்டுரை வெளியிட்டுள்ளது.

மஹாராஷ்டிரா உணவுப் பாதுகாப்பு ஆணையராக பணியாற்றி வருபவர் துக்காராம் முண்டே. இவர் பதவியேற்ற முதல் நாளில் இருந்தே அதிரடி நடவடிக்கைகள் எடுத்து வருகிறார். உணவகங்கள், உணவு உற்பத்தி நிறுவனங்களில் ரெய்டு நடத்தியுள்ளார். விதிமீறிய உணவகங்கள் பூட்டி சீல் வைக்கப்பட்டுள்ளன. ஏராளமான கெட்டுப்போன உணவுகள், காலாவதியான உணவுப் பொருட்கள், கலப்பட உணவுப் பொருட்கள் பறிமுதல் செய்து அழிக்கப்படுகின்றன.

இதன் பயனாக, உணவகங்களில் உணவுப் பாதுகாப்பு விதிமுறைகள் அமலாகத் துவங்கியுள்ளன. செயற்கை நிறமூட்டிகளை வியாபாரிகளே தவிர்க்க துவங்கியதால் மக்களுக்கு இதன் பலன் கிடைத்து வருகிறது. தினமும் தொலைக்காட்சிகள், பத்திரிகைகளில் துக்காராம் முண்டே நடத்திய அதிரடி ரெய்டுகளை பாராட்டி செய்திகள் வெளியாகி வருகின்றன. நேர்மையான ஐஏஎஸ் அதிகாரி என்று அறிமுகமான அவரது அதிரடியான நடவடிக்கைகளுக்கு மக்கள் மத்தியில் நல்ல வரவேற்பும் இருக்கிறது.

அந்நத வகையில், துக்காராம் முண்டே, பிரபல 'தி நியூயார்க் டைம்ஸ்' பத்திரிகையின் முதல் பக்கத்தில் ஒரு "ராக் ஸ்டார்" என்று வர்ணிக்கப்பட்டுள்ளார். தனது முதல் பக்கத்தில், “இந்தியாவில், ஒரு உணவு ஆய்வாளர் ஒரு ராக் ஸ்டார்” என்ற தலைப்பின் கீழ் துக்காராம் முண்டே குறித்த செய்தியை இடம்பெறச் செய்து, “உணவருந்துபவர்கள் அவரைப் போற்றுகிறார்கள், உரிமையாளர்கள் அவருக்கு அஞ்சுகிறார்கள்” என்ற வாசகத்துடன் செய்தி வெளியிட்டு இருக்கிறது.

தனது டிஜிட்டல் செய்தியில், நியூயார்க் டைம்ஸ் செய்தி நிறுவனம் அவரை “உணவுப் பாதுகாப்புப் பிரபலம்” என்று வர்ணித்ததுடன், அவரது ஆய்வுகள் எவ்வாறு அவரை ஒரு பொது நபராக மாற்றி, உணவு சுகாதாரத்தை வெளிச்சத்திற்குக் கொண்டு வந்துள்ளன என்பதையும் வெளியிட்டு இருக்கிறது. இது குறித்து பதில் அளித்து சமூக வலைதளத்தில் துக்காராம் முண்டே வெ ளியிட்ட பதிவில் கூறியிருப்பதாவது:

நல்லாட்சி என்பது தலைப்புச் செய்திகளில் இடம்பிடிப்பது அல்ல. அது ஒரு மாற்றத்தை ஏற்படுத்துவதாகும். உணவுப் பாதுகாப்பு என்பது மக்களைப் பாதுகாப்பதும், உணவின் தரத்தை உயர்த்துவதாகும்; நியாயமாக இயக்கும் நிறுவனங்கள் நம்பகத் தன்மையைப் பெறுகின்றன, உணவு பாதுகாப்பு துறை செயல்படுகிறது என்று மக்கள் நம்பத் துவங்கி உள்ளது. இதனை நியூயார்க் டைம்ஸ் நிறுவனம் பதிவு செய்துள்ளது. இவ்வாறு துக்காராம் முண்டே தெரிவித்துள்ளார்.