சென்னை: சர்வர் விலைகள் நான்கு மடங்கு அதிகரித்துள்ளது; ஐடி துறையில் நிச்சயமற்ற வணிக சூழல் என ஸோகோ நிறுவனத்தின் நிறுவனர் ஸ்ரீதர் வேம்பு தகவல் தெரிவித்துள்ளார்.

அவரது பதிவு: ஐடி துறை சார்ந்த வணிகச் சூழல் நிச்சயமற்ற நிலையில் உள்ளது. அதேவேளையில், ஏஐ பயன்பாடு மிக வேகமாக அதிகரித்து வருவதாலும், தரவு மையங்களுக்குத் தேவையான சர்வர் விலைகள் நான்கு மடங்கு உயர்ந்துள்ளதாலும் செலவுகள் பெருமளவு அதிகரித்துள்ளன; இந்தச் செலவுகளைக் கட்டுப்படுத்த நாங்கள் முயற்சித்து வருகிறோம்.

இதற்கிடையில், சவாலான புவிசார் அரசியல் சூழலும் ஒரு முக்கிய காரணியாக உள்ளது. நாங்கள் எங்கள் சந்தைப்படுத்தல் செலவுகளைக் குறைத்துள்ளோம். இந்த ஆண்டு வழக்கமான ஊதிய உயர்வு இருக்காது என்பதையும் ஊழியர்களிடம் தெரிவித்துள்ளோம். இந்த நிலையைத் தவிர்க்க இயலாததற்கு நான் அவர்களிடம் மன்னிப்புக் கேட்டுக்கொண்டேன்.

பெருமளவிலான ஆட்குறைப்பு நடவடிக்கைகளைத் தவிர்க்க நாங்கள் கடுமையாக முயற்சிப்போம்; இருப்பினும், ஒட்டுமொத்தமாக ஐடி துறை வேலைவாய்ப்புகளுக்கான சூழல் கவலைக்குரியதாகவே உள்ளது. கடந்த 18 மாதங்களாகவே நாங்கள் புதிய ஊழியர்களைப் பணியில் அமர்த்துவதை நிறுத்தி வைத்துள்ளோம்.

எங்கள் ஊழியர்களில் பெரும்பாலோர் இந்தச் சூழலைப் புரிந்துகொண்டுள்ளனர்; அவர்களுக்கு நான் நன்றியுள்ளவனாக இருக்கிறேன். நாங்கள் எங்களை முழுமையாகப் புதுப்பித்துக்கொள்ளும் முயற்சியில் ஈடுபட்டுள்ளோம்.

அடுத்த 3 முதல் 5 ஆண்டுகள், எங்கள் இந்த மாற்றமும் புதுப்பித்தலும் எந்தளவுக்குப் பலனளித்துள்ளது என்பதைத் தீர்மானிக்கும். தயவுசெய்து எங்களுக்காகப் பிரார்த்தனை செய்யுங்கள். இவ்வாறு ஸ்ரீதர் வேம்பு கூறியுள்ளார்.