​பாரிஸ்: தொழிலதிபர் எலான் மஸ்க், ஐரோப்பிய தலைவர்களை குறிவைத்து இணைய வழியில் அச்சுறுத்தி வருவதாகவும், வரும் அதிபர் தேர்தலில் அந்நிய சக்திகள் தலையிட வாய்ப்புள்ளதாகவும் பிரான்ஸ் அரசு பகிரங்கமாக எச்சரித்துள்ளது சர்வதேச அரசியலில் பெரும் பரபரப்பை ஏற்படுத்தியுள்ளது.

சரமாரி தாக்கு:

இதுகுறித்து பிரான்ஸ் வெளியுறவுத்துறை அமைச்சர் ஜீன் நோயல் பரோட் கூறியதாவது: எலான் மஸ்க் தனது எக்ஸ் சமூகவலைதளத்தின் மூலம், ஐரோப்பிய தலைவர்களுக்கு எதிராக, திட்டமிட்டு இன்டர்நெட் வழியாக அவதூறு பிரசாரங்களை முன்னெடுத்து வருகிறார். இதன் மூலம் ஐரோப்பிய நாடுகளின் உள்நாட்டு அரசியல் விவகாரங்களில் தலையிட்டு குழப்பத்தை ஏற்படுத்த அவர் முயற்சிக்கிறார். ​ஜெர்மனியில் ஏ.எப்.டி., கட்சிக்கு ஆதரவாக கருத்து பதிவிடுவதும், பிரிட்டன் விவகாரங்களில் தீவிர கருத்துக்களை பரப்புவதும் மஸ்க்கின் வழக்கமாகிவிட்டது.

​தேர்தலில் தலையிட சதி?

பிரான்சில் 2027ம் ஆண்டு ஏப்ரல் - மே மாதங்களில் அதிபர் தேர்தல் நடைபெற உள்ளது. இதில், மதச்சார்பின்மை, இஸ்ரேல் - பாலஸ்தீன மோதல் போன்ற தீவிர விவகாரங்களை கையில் எடுத்து, அதன் மூலம் வெறுப்புணர்வை தூண்டி, தேர்தலில் தலையிட சதி நடக்கிறது.

​இறையாண்மைக்கு அச்சுறுத்தல்:

சமீபத்தில் பிரான்சில் பள்ளி மாணவர்கள் நடத்தி வரும் போராட்டத்தை மையமாக வைத்து ரஷ்யா, சீனா, ஈரான் மற்றும் டிரம்பின் ஆதரவாளர்கள் தரப்பிலிருந்து பல்வேறு அவதூறு பிரசாரங்கள் இன்டர்நெட்டில் பரப்பப்பட்டு வருகின்றன. பிரான்சில் சட்டவிரோத குடியேற்றம் அதிகமாகிவிட்டதாக முன்னாள் அதிபர் டிரம்ப் பதிவிட, அதற்கு எலான் மஸ்க், இது மெல்ல நிகழும் ஆக்கிரமிப்பு என்றும், இதற்கு ஆதரவளிப்பவர்கள் துரோகிகள் என்றும் பதிவிட்டுள்ளார்.

​எந்த நாடாக இருந்தாலும் சரி, எங்கிருந்து வந்தாலும் சரி, எங்கள் நாட்டு விவகாரங்களில் அந்நிய சக்திகள் தலையிடுவதை ஒருபோதும் பொறுத்துக் கொள்ள மாட்டோம்; இது நாட்டின் இறையாண்மை சம்பந்தப்பட்ட விஷயம். இவ்வாறு அவர் காட்டமாக தெரிவித்துள்ளார்.