சமயநல்லுார்: வெளிமாநிலத்திலிருந்து தபாலில் போதை மாத்திரைகள் வாங்கிய வாலிபரை போலீசார் கைது செய்தனர்.

தேனி மாவட்டம் பெரியகுளத்தைச் சேர்ந்தவர் கோகுல் 20. இவர் ஹரியானாவைச் சேர்ந்த ஒருவருடன் ஆன்லைன் செயலி மூலம் பழகி 900 வலி நிவாரணி மாத்திரைகளை மதுரை சமயநல்லுாரில் போலி முகவரியில் ஆர்டர் செய்து வாங்கினார்.

தகவலறிந்த போலீசார் கோகுலை கைது செய்து விசாரித்தனர். அப்போது பள்ளி, கல்லுாரி மாணவர்களிடம் போதைக்காக வலி நிவாரணி மாத்திரைகளை அவர் விற்றது தெரிந்தது.

மேலும் இதில் தொடர்புடையவர்களை போலீசார் தேடி வருகின்றனர். சில நாட்களுக்கு முன் சோழவந்தானிலும் இதேபோல் போதை மாத்திரைகள் வாங்கியவரை போலீசார் கைது செய்தனர்.