கோல்கட்டா: மேற்கு வங்கத்தில் துர்கா பூஜையின் போது ஏற்பட்ட கூட்ட நெரிசலில் சிக்கி 40க்கும் மேற்பட்டோர் படுகாயம் அடைந்தனர். மூச்சுத்திணறி மயங்கி விழுந்தவர்களில் 20 பேர் பலியானதாக முதல்கட்ட தகவல் வெளியாகி உள்ளது.

இதுபற்றிய விவரம் வருமாறு;

வடக்கு கோல்கட்டாவில், சோர்பகன் சர்போஜனின் என்ற இடத்தில் துர்கா பூஜையை கொண்டாட பந்தல் ஒன்று அமைக்கப்பட்டு இருந்தது. சப்தமி நாள் என்பதால் ஏராளமானோர் ஒரே நேரத்தில் அங்கு திரண்டனர். கூட்டம் அதிகரித்த தருணத்தில் பந்தலின் ஒரு பகுதி திடீரென இடிந்து விழுந்தது.

இதில் 40க்கும் மேற்பட்டோர் சிக்கி படுகாயம் அடைந்தனர். ஏராளமானோர் உயிரிழந்து இருக்கலாம் என்று அஞ்சப்படுகிறது. முதல்கட்டமாக பலியானவர்கள் 20 பேர் என தெரிய வந்திருக்கிறது. படுகாயம் அடைந்தவர்கள் மருத்துவமனைக்கு கொண்டு செல்லப்பட்டனர்.

முதல்வர் சுவேந்து அதிகாரி, அதிகாரிகளுடன் சென்று மருத்துவமனையில் சிகிச்சை பெற்று வருபவர்களை சந்தித்தார். மேலும் விபத்து எப்படி ஏற்பட்டது என்றும் அவர்களிடம் கேட்டறிந்தார். கூட்ட நெரிசலில் சிக்கி பலியானவர்களுக்கு கவர்னர் ஆர்என் ரவி இரங்கல் தெரிவித்துள்ளார்.

அவர் தமது பதிவில் கூறி உள்ளதாவது;

கோல்கட்டாவில் துர்கா பூஜை பந்தல் ஒன்றில் கூட்ட நெரிசலில் சிக்கி உயிர்கள் பறிபோனது குறித்து அறிந்து மிகவும் துயரம் அடைந்தேன். உயிரிழந்தவர்களின் குடும்பத்தினருக்கு எனது ஆழ்ந்த இரங்கல். காயம் அடைந்தவர்கள் விரைவில் குணம்பெற வாழ்த்துகிறேன்.

இவ்வாறு அவர் குறிப்பிட்டுள்ளார்.