சென்னை மாநகராட்சி கமிஷனர் சமீரன் அளித்த பேட்டி;

சென்னையில் நேற்று பெய்த மழையில் எதிர்பார்க்காத சில இடங்களில் நீர் தேங்கியிருப்பதை நாங்கள் அடையாளம் கண்டிருக்கிறோம். அதற்கு பல்வேறு காரணங்கள் உண்டு. பிராட்வே, பிரகாசம் சாலை, பாரிசை ஒட்டிய பகுதிகளில் பெரிய வடிகால்கள் கட்டி இருக்கிறோம். ஆனால் அங்கெல்லாம் மழைநீர் தேங்கியிருந்தது. காரணம் அங்கு குறைந்த நேரத்தில் 36 செமீ மழை பெய்திருந்தது.

2005ம் ஆண்டில் இருந்து பல்வேறு திட்டங்கள் 2026ம் ஆண்டு வரை செயல்படுத்தப்பட்டுள்ளன. கடந்த 20 ஆண்டுகளில் கட்டப்பட்ட உட்கட்டமைப்பு வசதிகள், 3 ஆயிரத்திற்கும் மேற்பட்ட வடிகால்கள் கட்டியிருக்கிறோம். இது மாநகராட்சி மூலமாக மட்டுமல்ல, தமிழக நீர்வளத் துறை மூலமாகவும் பெரிய திட்டங்கள் கொண்டு வந்திருக்கிறோம். பெரிய நீர்த்தேக்கங்களை தூர் வாரியிருக்கிறோம்.

எனவே தனியாக ஒவ்வொன்றையும் எடுத்து, சாதகமாகவோ அல்லது விமர்சனமாகவோ பார்த்தால் சரியாக இருக்காது. ஒருமுறை மழைநீர் வடிந்து விட்டது என்பதை வெற்றியாக கொண்டாட முடியாது. அதில் உள்ள அனுபவங்களை உணர்ந்து கொண்டு அடுத்தடுத்து என்ன செய்ய வேண்டும் என்பதை தான் முதல்வர் எங்களுக்கு ஆணையிட்டுள்ளார். அந்த கோணத்தில் தான் நாங்கள் செய்திருக்கிறோம்.

ஒவ்வொரு காலகட்டத்திலும் நடந்த உட்கட்டமைப்பு வசதிகள், கண்டிப்பாக மாநகராட்சிக்கு உதவுகிறது. அதோடு முடிவதில்லை. இந்த பணிகள் தொடர்ந்து நடக்க வேண்டும். உட்கட்டமைப்புடன் பராமரிப்பும் முக்கியம்.

வடிகால்களுக்கு கொள்ளளவு என்பது உண்டு. ஒரு மணிநேரத்தில் 6.4 சென்டி மீட்டரில் இருந்து 10 சென்டிமீட்டர் மழையை அந்த வடிகால் உள்வாங்கும். அதற்கு மேல் மழை பெய்தால் கண்டிப்பாக தண்ணீர் வெளியேதான் வரும்.

பொதுமக்களின் சிரமத்தை உடனடியாக குறைக்க வேண்டும், போக்குவரத்தில் உள்ள சிரமத்தை குறைக்க வேண்டும், இயல்பு நிலைக்கு விரைவில் திரும்ப வேண்டும் என்ற நோக்கத்தில் தான், கூடுதலாக மோட்டார் பம்புசெட்டை கொடுத்து, தேங்கிய மழைநீரை வெளியேற்றுகிறோம்.

பேரிடரை பொறுத்தவரை நாம் எல்லாவற்றையும் செய்துவிட்டோம், சாதித்து விட்டோம் என்று சொல்ல முடியாது. இயற்கையுடன் போட்டி போடவும் முடியாது. ஒரு மனிதனால், ஒரு அமைப்பினால் என்ன செய்ய முடியுமோ, அதை கூட்டாக இணைந்து அர்ப்பணிப்புடன் செய்வது தான் எங்கள் நோக்கம்.

இவ்வாறு சமீரன் பேட்டியளித்தார்.