விழுப்புரம் மாவட்டம், செஞ்சி அடுத்த உள்ள ஆலம்பூண்டியில் 7 வயது சிறுமி ப்ரியா (பெயர் மாற்றப்பட்டு உள்ளது) அக். 11ம் தேதி பிறந்த நாளை கொண்டாடி விட்டு தாயாருடன் வீட்டில் தூங்கிக் கொண்டு இருந்த போது மாயமானார். இதுகுறித்து போலீசில் தாய் புகார் அளித்தார்.

சிறுமியை கண்டுபிடிக்க போலீசார், பல்வேறு கோணங்களில் விசாரணை நடத்தினர். எஸ்பி நேரடி மேற்பார்வையில் தனிப்படைகள் அமைக்கப்பட்டு விசாரணை தீவிரப்படுத்தப்பட்டது.

மொபைல் போன் தொடர்புகள் மற்றும் டவர் தகவல்களை ஆய்வு செய்தபோது, சிறுமி காணாமல் போன இரவு இரண்டு பேர் நீண்ட நேரம் மொபைல் போனில் பேசி உள்ளனர். சந்தேகத்தின் அடிப்படையில் இரண்டு பேரையும் சத்தியமங்கலம் காவல் நிலையத்தில் வைத்து விசாரணை நடத்தினர்.

சிறுமி காணாமல் போய் 10 நாட்கள் கடந்தும் வழக்கில் முன்னேற்றம் இல்லை. இதுவரை எந்த துப்பும் கிடைக்கவில்லை. இதையடுத்து, வழக்கு விசாரணை சிபிசிஐடிக்கு மாற்றி உத்தரவு பிறப்பிக்கப்பட்டு உள்ளது.