செஞ்சி: செஞ்சி அருகே காணாமல் போன சிறுமி மற்றும் பெண்ணை மூன்று மணி நேரத்தில் போலீசார் மீட்டு குடும்பத்தினரிடம் ஒப்படைத்தனர்.

விழுப்புரம் மாவட்டம் செஞ்சி அடுத்த என்.ஆர். பேட்டை கிராமத்தில், ஒரே தெருவை சேர்ந்த 15 வயது சிறுமி மற்றும் 19 வயது பெண் ஆகிய இருவரும் தங்களது பெற்றோரிடம் கோபித்துக் கொண்டு இன்று அதிகாலை வீட்டை விட்டு வெளியே சென்று விட்டனர்.

அவர்களது பெற்றோர் இன்று காலை 11:00 மணியளவில் செஞ்சி போலீசில் புகார் அளித்தனர்.

புகாரின் அடிப்படையில் உடனடியாக இன்ஸ்பெக்டர் விநாயக முருகன் மற்றும் போலீசார் வழக்கு பதிந்து, அப்பகுதியில் உள்ள சி.சி.டி.வி., கேமரா காட்சிகள் மற்றும் மொபைல்போன் எண் உதவியுடன் தீவிர விசாரணை மேற்கொண்டனர்.

விசாரணையில், இருவரும் வேலுார் மார்க்கமாக பஸ்சில் சென்றது தெரியவந்தது. உடனடியாக போலீசார் வேலுார் சென்ற போது பஸ் நிலையத்தில் சிறுமியும் பெண்னும் செய்வதறியாது நின்றுகொண்டிருந்ததை பார்த்தனர்.

அவர்களை மீட்டு பத்திரமாக பெற்றோரிடம் ஒப்படைத்தனர்.

புகார் கொடுத்த மூன்று மணி நேரத்தில் இருவரையும் கண்டுபிடித்த செஞ்சி போலீசாருக்கு மாவட்ட எஸ்பி மதிவாணன் பாராட்டுகளை தெரிவித்தார்.