கரூர்:கரூர் கல்யாண பசுபதீஸ்வரர் கோவிலில், அன்னாபிஷேக விழா நடந்தது. அதில், ஏராளமான பக்தர்கள் பங்கேற்றனர்.

ஆண்டுதோறும் ஐப்பசி மாதம் பவுர்ணமி நாளில், அனைத்து சிவாலயங்களிலும், அன்னாபிஷேக விழா நடப்பது வழக்கம். அதன்படி, நேற்று மாலை, கரூர் கல்யாண பசுபதீஸ்வரர் கோவிலில், மூலவர் பசுபதீஸ்வரர், நாகேஸ்வரர், கரிய மாலீஸ்வரர் சிலைகளுக்கும், கரூர் உழவர் சந்தை எதிரே, விசாலாட்சி சமேத வஞ்சுலீஸ்வரர் கோவிலில் மூலவருக்கும் சிறப்பு அபிஷேகம் மற்றும் அன்னாபிஷேகம் நடந்தது. பின், பக்தர்களுக்கு அன்னதானம் வழங்கப்பட்டது.
அதேபோல், திருக்காடுதுறை மாதேஸ்வரி அம்பிகை சமேத மாதேஸ்வரன் கோவில், சின்ன சேங்கல் ஸ்ரீ மீனாட்சி சுந்தரேஸ்வரர் கோவில், நன்செய் புகழூர் மேகபாலீஸ்வரர் கோவில்களிலும் மூலவருக்கு, சிறப்பு அபிஷேகம் நடத்தப்பட்டு, அன்னாபிஷேகம் செய்யப்பட்டது.