சிவகங்கை: மாவட்டத்தில் 4 தொகுதிக்கான வரைவு வாக்காளர் பட்டியல் நவ., 12 ல் வெளியிட உள்ளதாக சிவகங்கை கலெக்டர் ஆகாஷ் தெரிவித்தார். அவர் கூறியதாவது: வாக்காளர் பட்டியல் சுருக்க திருத்தம் செய்வதற்காக 1,200 க்கும் அதிகமான வாக்காளர்கள் உள்ள ஓட்டுச்சாவடிகளை பிரிக்கவும், பழுதான ஓட்டுச்சாவடி கட்டடங்களுக்கு மாற்றாக ஓட்டுச்சாவடிக்கு புதிய கட்டடங்கள் ஏற்படுத்துதல், வாக்காளர் பட்டியலில் பெயர் திருத்தம் போன்ற பணிகள் மேற்கொள்ளப்படும்.

4 சட்டசபை தொகுதிகளில் 1,518 ஓட்டுச்சாவடிகள் உள்ளன. 1,200 க்கும் மேற்பட்ட வாக்காளர்கள் உள்ள ஓட்டுச்சாவடிகளை பிரிப்பதின் மூலம் ஓட்டுச்சாவடிகள் எண்ணிக்கை 1,519 ஆக உயர உள்ளன. வாக்காளர் பட்டியல் சிறப்பு சுருக்கமுறை திருத்தம் தொடர்பாக வரைவு வாக்காளர் பட்டியல் நவ., 12 ல் வெளியிடப்படும். வாக்காளர்கள் அனைவரும் இந்த வாக்காளர் பட்டியலை பார்வையிட்டு, தங்களது பெயர் இடம் பெற்றுள்ளதை உறுதி செய்ய வேண்டும். விடுபட்ட வாக்காளர், வயது 18 பூர்த்தியான புதிய வாக்காளர்களை சேர்க்க ஓட்டுச்சாவடி அலுவலர்கள் நடவடிக்கை எடுத்து வருகின்றனர். இதற்கு வாக்காளர்கள் முழு ஒத்துழைப்பு தர வேண்டும் என்றார். ///