நாகப்பட்டினம்: வங்கக் கடலில் உருவான ஒர்னா புயலையடுத்து, நாகையில் கனமழை பெய்து வருகிறது. மீனவர்கள் கடலில் மீன்பிடிக்கச் செல்ல தடை விதிக்கப்பட்டு, துறைமுகத்தில் 3 ம் எண் புயல் எச்சரிக்கை கூண்டு ஏற்றப்பட்டுள்ளது.

வங்கக்கடலில் உருவான காற்றழுத்த தாழ்வு பகுதி, தாழ்வு மண்டலமாக வலுப்பெற்று, புயலாக உருமாறியுள்ளது. ஒர்னா புயலாக பெயரிடப்பட்டு, ஆந்திரா மாநிலம் விசாகப்பட்டினத்தில் இருந்து தென்கிழக்கே 650 கி.மீட்டரில் மையம் கொண்டுள்ளது. நாளை( 28ம் தேதி) விசாகப்பட்டினம் முதல் பாபட்லா இடையில் கரையை கடக்க வாய்ப்புள்ளதாக வானிலை மையம் தெரிவித்துள்ளது.

இதன் காரணமாக நாகை மாவட்டத்தில் பரவலாக கனமழை கொட்டி வருகிறது. கடல் பரப்பில் அலைகள் ஆக்ரோஷத்துடன் கரையை நோக்கி வருகின்றன. மீனவர்களை எச்சரிக்கும் விதமாக, நாகை துறைமுக அலுவலகத்தில், 3 ம் எண் புயல் எச்சரிக்கை கூண்டு ஏற்றப்பட்டுள்ளது. கடலில் மீன்பிடிக்க சென்றுள்ள விசைப்படகுகள் பாதுகாப்பாக உடனடியாக கரை திரும்பவும், மறு அறிவிப்பு வரும் வரை, கடலில் மீன்பிடிக்க மீனவர்கள் செல்லக்கூடாது என அறிவுறுத்தப்பட்டுள்ளது.