விழுப்புரம்: விழுப்புரத்தில் டேங்கர் லாரியில் பழுது பார்த்தபோது கேபின் விழுந்ததில் எலக்ட்ரீஷியன் இறந்தார்.

விழுப்புரம் சாலாமேட்டைச் சேர்ந்தவர் அரிகிருஷ்ணன், 51; எலக்ட்ரீஷியன். இவர் இன்று (அக்.,26) விழுப்புரம் ஆவின் பால் பண்ணை வளாகத்தில் டேங்கர் லாரியின் கேபினை துாக்கிவிட்டு பழுதுபார்க்கும் பணியில் ஈடுபட்டார்.

அப்போது, கேபின் திடீரென அரிகிருஷ்ணன் தலையில் விழுந்ததில் படுகாயமடைந்தார். உடன், முண்டியம்பாக்கம் அரசு மருத்துவக்கல்லுாரி மருத்துவமனைக்கு கொண்டு செல்லும் வழியில் இறந்தார்.

இது குறித்து போதிய பாதுகாப்பு உபகரணங்கள் இல்லாமல் வேலை வாங்கியதாக, ஆவின் டெக்னிக்கல் மேலாளரான விழுப்புரம் ஆடல் நகரைச் சேர்ந்த சாமிநாதன், 55; என்பவர் மீது விழுப்புரம் தாலுகா போலீசார் வழக்குப் பதிந்து விசாரிக்கின்றனர்.