சென்னை: திமுக தலைவர் ஸ்டாலின் வெளியிட்டுள்ள அறிக்கை: சென்னை வளர்ச்சி ஆராய்ச்சி நிறுவனத்தில் உதவிப் பேராசிரியராக உள்ள முனைவர் கலையரசனை சீருடை அணியாத போலீசார்கள் சட்டவிரோதமாகக் கைது செய்து, வாடகை வாகனத்தில் ஏற்றிச் சென்ற செய்தியைக் கேட்டு மிகுந்த அதிர்ச்சிக்கு உள்ளானேன்.

கைது செய்யப்பட்டவர் சாதாரண நபரோ, குற்றப் பின்னணி கொண்டவரோ இல்லை. தமிழகத்தின் முதன்மையான ஆராய்ச்சி நிறுவனத்தில் பணிபுரியும் பேராசிரியர். தமிழக முதல்வர் தலைவராக இருக்கும் தமிழ்நாடு காலநிலை மாற்ற நிர்வாகக் குழுவின் உறுப்பினராக இப்போதும் இருப்பவர். அப்படிப்பட்டவரைத் தெரியாமல் கைது செய்துவிட்டோம் என்று கூறுவது நம்பும்படி இல்லை.

அறிந்ததுதான்

செய்யாத குற்றத்திற்காக, அடிப்படை உரிமைகள் அனைத்தையும் மறுத்து, அவரது செல்போனைப் பறித்து, கைது செய்து அலைக்கழித்ததைச் சாதாரணச் செயலாக எவரும் கடந்துபோக முடியாது. குற்றவாளிகளை எல்லாம் கூத்தடிக்க விட்டுவிட்டு, கல்வியாளர்களை அச்சுறுத்திப் பார்ப்பது எவ்வளவு பெரிய அசிங்கம்? கலையரசன் ஏன் கைது செய்யப்பட்டார்? திராவிட ஆட்சியால் தமிழகம் அடைந்த வளர்ச்சியை உலகம் முழுவதும் பறைசாற்றியதற்காகவா? தவெக ஆட்சி அமைந்த பிறகுதான், தமிழகம் இதுவரை சந்தித்திராத விலைவாசி உயர்வைச் சந்தித்துள்ளது என்ற உண்மையைச் சொன்னதற்காகவா?

முட்டாள்களால் நிறைந்த தவெகவுக்கும் கல்விக்கும் எந்தத் தொடர்பும் இல்லை என்பது அனைவரும் அறிந்ததுதான். கல்வியாளர்களைக் கைது செய்து மிரட்டும் அளவுக்கு அறிவின் மீது ஒவ்வாமை கொண்டவர்களாக இவர்கள் நடந்துகொள்வார்கள் என நிச்சயமாக நினைக்கவில்லை. பாசிசத்தில் பாஜவையும் மிஞ்சிவிடுவார்கள் என்பதைத்தான் இந்தக் கைது காட்டுகிறது. முதல்வரின் ஒப்புதலோடும் உயரதிகாரிகளின் அனுமதியோடும்தான் இந்த அத்துமீறல் நடக்கிறதா? கலையரசன் எந்தக் கட்சியையும் சார்ந்தவர் அல்ல. கடந்த ஆட்சிக்காலத்திலும், அவர் சுதந்திரமாகத் தன்னுடைய விமர்சனக் கருத்துகளை முன்வைத்திருக்கிறார்.

ரவுடி அரசு

இந்தத் தரங்கெட்ட தவெக ஆட்சியோ, எங்கள் ஆட்சியைப் பற்றியோ நிர்வாகத் தோல்விகளைப் பற்றியோ ஊடகங்களில் உண்மையைப் பேசினால் விளைவுகள் மோசமாக இருக்கும் என்று மிரட்டும் ரவுடி அரசாகச் செயல்பட்டுள்ளது. இப்படிப்பட்ட அரசிற்கு ஆதரவு அளித்துக் கொண்டு இருக்கும் கட்சிகள், இந்த அநியாயத்தைக் கண்டும் காணாமல் இருப்பது ஏன்?

இதுதான் இவர்கள் பாசிசத்தை எதிர்த்துக் கேள்வி கேட்கும் அரசியலா? புகழ்பெற்ற பேராசிரியர் மீது பொய்யான குற்றச்சாட்டைப் புனைந்து, அவரை அலைக்கழித்து, துன்புறுத்திய தவெக அரசின் பாசிச செயல் கடும் கண்டனத்துக்குரியது. தமிழக போலீசாரும், அதற்குப் பொறுப்பு வகிக்கும் முதல்வரும் கலையரசனிடம் பகிரங்கமாக மன்னிப்பு கேட்க வேண்டும். இவ்வாறு ஸ்டாலின் கூறியுள்ளார்.

@block_P@

காரணம் என்ன?

சென்னை வளர்ச்சி ஆராய்ச்சி நிறுவனத்தில் உதவிப் பேராசிரியராக கலையரசன் பணிபுரிந்து வருகிறார். இவர் சமூக வலைதளத்தில், பல்லாவரம் தொகுதி தவெக எம்எல்ஏ காமாட்சியை அவதூறாக விமர்சித்துப் பதிவிட்டதாகக் கூறி விசாரணைக்காக போலீசாரால் அழைத்துச் செல்லப்பட்டார். கலையரசன் போலீசாரிடம் 'தனது புகைப்படத்தைப் பயன்படுத்தி யாரோ விஜயமணி என்ற பெயரில் போலி இன்ஸ்டாகிராம் கணக்கு ஒன்றை உருவாக்கியுள்ளனர். அதற்கும் தனக்கும் எந்தத் தொடர்பும் இல்லை' என்று கூறியுள்ளார். இது குறித்து டிஜிபியிடம் புகார் அளித்துள்ளதாகவும் தெரிவித்தார். விசாரணைக்குப் பிறகு அவரிடமிருந்து கடிதத்தை பெற்றுக்கொண்டு போலீசார் அவரை விடுவித்தனர்.block_P