-நமது நிருபர்-

சற்று நேரத்தில், 'டேக் ஆப்' ஆக வேண்டிய அந்த, 'ஸ்பைஸ்ஜெட்' விமானத்தில் ஏறிய பயணி ஒருவர், ஜன்னலில் டேப் ஒட்டியிருப்பதையும், அது தளர்ந்து இருப்பதையும் கண்டு அதிர்ச்சி அடைந்தார். விமான ஊழியரிடம் கேள்வியும் எழுப்பினார்.

அவர்களுக்கு இடையே நடந்த காரசார வாக்குவாதத்தின் வீடியோ வைரலாகியுள்ளது. 'அதனால் எந்தப் பாதுகாப்புப் பிரச்னையும் இல்லை' என, கூறிய விமான ஊழியர், 'இந்த விமானத்தில் பயணிப்பது சிரமம் என்றால், நீங்கள் பயணத்தை தவிர்த்து விடலாம்' என, துடுக்காக பேசினார்.

அவரது பேச்சு பயணியருக்கு அதிருப்தியை ஏற்படுத்தியது. 'எங்கள் பாதுகாப்புக்கு என்ன உத்தரவாதம்' என்ற பயணியின் கேள்விக்கு, தானே பொறுப்பேற்பதாகவும் அந்த ஊழியர் பதிலளித்தார்.

இந்த வாக்குவாதத்தின் வீடியோவை கண்ட வலைதளவாசிகள், ஸ்பைஸ்ஜெட் பற்றிய தங்கள் அனுபவத்தை பதிவிட்டு வருகின்றனர். கேள்வி எழுப்பிய பயணிகளுக்கு முறையான விளக்கம் தராமல், விமான ஊழியர்கள் அலட்சியமாகப் பதிலளித்த விதம் தற்போது விமர்சனத்திற்குள்ளாகி உள்ளது.

வீடியோவில், விமானம் புறப்பட்ட அல்லது செல்லவிருந்த குறிப்பிட்ட ஊர் விவரங்களை பயணிகள் குறிப்பிடவில்லை. இந்த சம்பவம் குறித்து ஸ்பைஸ்ஜெட் விமான நிறுவனம் எந்த விளக்கத்தையும் அளிக்கவில்லை.