சிவகாசி: சிவகாசி அருகே அனுப்பன்குளத்தில் பயன்பாட்டில் இல்லாத கால்நடை துறைக்கு சொந்தமான கோழி குஞ்சு பொறிக்கும் மையத்தில் ஏற்பட்ட தீ விபத்தில் இயந்திரங்கள் சேதம் அடைந்தது.

சிவகாசி சாத்துார் ரோட்டில் அனுப்பன்குளத்தில் கால்நடை துறைக்கு சொந்தமான மின்சாரம் மூலம் கோழி முட்டையிலிருந்து குஞ்சு பொரிக்கும் மையம் உள்ளது. இந்தக் கட்டடம் 20 ஆண்டுகளாக செயல்படாமல் பூட்டப்பட்டு உள்ளது. இந்நிலையில் நேற்று காலை இந்த கட்டடத்தில் இருந்து புகை வந்தது.

சிவகாசி தீயணைப்பு துறை நிலைய அலுவலர் வெங்கடேசன் தலைமையில் தீயணைப்புத் துறையினர் ஒரு மணி நேரம் போராடி தீயை அணைத்தனர். இதில் கட்டடத்தின் உள்ளிருந்த இயந்திரங்கள் சேதம் அடைந்தது.

பல ஆண்டுகளாக செயல்படாமல் இருந்ததால் இக்கட்டடத்தில் மின் இணைப்பு துண்டிக்கப்பட்ட நிலையில் தீ விபத்து ஏற்பட்டதற்கான காரணம் தெரியவில்லை.

எனவே சமூக விரோதிகள் தீ வைத்திருக்கலாம் என்ற கோணத்தில் கிழக்கு போலீசார் விசாரிக்கின்றனர்.