திருப்பூர்; பள்ளி கல்வித்துறை சார்பில், ஈரோடு, வ.உ.சி., மைதானத்தில், 65வது குடியரசு தின விழா, மாநில தடகள போட்டி நடக்கிறது. இதில், திருப்பூர் மாவட்ட வீரர், வீராங்கனைகள், 131 பேர் பங்கேற்கின்றனர்.

திருப்பூர் மாவட்ட அளவிலான, தடகள போட்டியில் வெற்றி பெற்று, முதல் இரண்டு இடங்களை பெற்றவர்கள் ஈரோட்டில் நடக்கும் மாநில தடகள போட்டியில் பங்கேற்க தகுதி பெற்றுள்ளனர். நவ., 6 முதல், 11ம் தேதி வரை நடக்கும் மாணவியர் தடகள போட்டிக்கு, திருப்பூர் மாவட்டத்தில் இருந்து, 54 பேர் சென்றுள்ளனர்.

இன்று (நவ., 9) துவங்கி வரும், 11ம் தேதி வரை, மாநில ஆண்கள் தடகள போட்டி நடக்கிறது. இதில், பங்கேற்க, 77 வீரர்கள் நேற்று, ஈரோடு புறப்பட்டுச் சென்றனர். மாநில தடகள போட்டியில் பங்கேற்க பயணமாகியுள்ள, 54 வீராங்கனைகள், 77 வீரர்களுக்கு மாவட்ட கல்வித்துறை, விளையாட்டுத்துறை அலுவலர்கள் வாழ்த்து தெரிவித்துள்ளனர்.