காஞ்சிபுரம்: காஞ்சிபுரம் மாவட்டத்தில் கடந்த 29ல் வெளியிடப்பட்ட வாக்காளர் பட்டியல்படி, 13 லட்சத்து, 55,188 வாக்காளர்கள் உள்ளனர்.

இதில், 6 லட்சத்து, 58,818 பேர் ஆண்களும், 6 லட்சத்து, 96,153 பெண்களும், 217 பேர் மூன்றாம் பாலினத்தவரும் ஆவர்.

இதையடுத்து, வரும் ஜனவரி மாதம் முதல் வாரத்தில் இறுதி வாக்காளர் பட்டியல் வெளியிடப்பட உள்ளது.

முன்னதாக, வாக்காளர் பட்டியலில் பெயர் சேர்க்க, நீக்க, திருத்தம் மேற்கொள்ள இம்மாதம் 16, 17 மற்றும் 23, 24 ஆகிய தேதிகளில், அந்தந்த ஓட்டுச்சாவடிகளில் நடைபெறும் என, தேர்தல் கமிஷன் அறிவித்தது.

முதற்கட்ட முகாம், கடந்த 16, 17 ஆகிய நாட்களில், காஞ்சிபுரம் மாவட்டத்தில் 1,401 ஓட்டுச்சாவடிகளில் நடந்தது. பெயர் சேர்க்க படிவம் - 6, பெயர் நீக்கம் செய்வதற்கு படிவம் - 7, தொகுதி மற்றும் முகவரி மாற்றம் இருந்தால், படிவம் - 8 ஆகிய விண்ணப்பங்களை வாக்காளர்கள் வழங்கினர்.

முதற்கட்டமாக நடந்த முகாமில், 15,297 பேர் மனு அளித்துள்ளனர். இதில், 8,650 பேர், வாக்காளர் பட்டியலில் பெயர் சேர்க்க விண்ணப்பம் செய்துள்ளனர்.