துபாய்: ஐ.சி.சி., டெஸ்ட் பவுலருக்கான 'ரேட்டிங்' புள்ளியில் இந்தியாவின் பும்ரா, அஷ்வினை முந்தினார்.

டெஸ்ட் அரங்கில் சிறந்து விளங்கும் வீரர்களுக்கான தரவரிசை பட்டியலை சர்வதேச கிரிக்கெட் கவுன்சில் (ஐ.சி.சி.,) துபாயில் வெளியிட்டது. பவுலருக்கான தரவரிசையில் இந்திய வேகப்பந்துவீச்சாளர் ஜஸ்பிரித் பும்ரா, 907 'ரேட்டிங்' புள்ளிகளுடன் முதலிடத்தை தக்கவைத்துக் கொண்டார். மெல்போர்னில் டெஸ்டில் 'வேகத்தில்' மிரட்டிய இவர், இரு இன்னிங்சிலும் சேர்த்து 9 விக்கெட் சாய்த்தார். டெஸ்ட் பவுலருக்கான தரவரிசையில் அதிக 'ரேட்டிங்' புள்ளி (907) பெற்ற இந்திய பவுலரானார் பும்ரா. இதற்கு முன், 2016, டிசம்பரில் வெளியான தரவரிசையில் இந்திய சுழற்பந்துவீச்சாளர் அஷ்வின், 904 'ரேட்டிங்' புள்ளி பெற்றிருந்தார். இதனை பும்ரா, சமீபத்தில் (டிச. 25) வெளியான தரவரிசையில் சமன் செய்திருந்தார்.

டெஸ்ட் தரவரிசையில் அதிக 'ரேட்டிங்' புள்ளி பெற்ற பவுலர்களுக்கான பட்டியலில் 17வது இடத்தை இங்கிலாந்தின் டெரெக் அண்டர்வுட் (907) உடன் பகிர்ந்து கொண்டுள்ளார் பும்ரா. முதல் நான்கு இடங்களில் இங்கிலாந்தின் சிட்னி பார்ன்ஸ் (932), ஜார்ஜ் லோமன் (931), பாகிஸ்தானின் இம்ரான் கான் (922), இலங்கையின் முரளிதரன் (920) உள்ளனர்.
மெல்போர்ன் டெஸ்டில் 6 விக்கெட் வீழ்த்திய ஆஸ்திரேலிய கேப்டன் பாட் கம்மின்ஸ் (837) 3வது இடத்துக்கு முன்னேறினார். பாகிஸ்தானுக்கு எதிரான செஞ்சுரியன் டெஸ்டில் 7 விக்கெட் (1+6) வீழ்த்திய தென் ஆப்ரிக்காவின் மார்கோ யான்சென் (803), 11வது இடத்தில் இருந்து 5வது இடத்துக்கு முன்னேறினார்.


ஜெய்ஸ்வால் 'நம்பர்-4': பேட்டர் தரவரிசையில் இந்தியாவின் யாஷஸ்வி ஜெய்ஸ்வால், 854 புள்ளிகளுடன் 4வது இடத்துக்கு முன்னேறினார். இவர், மெல்போர்ன் டெஸ்டின் இரு இன்னிங்சிலும் அரைசதம் விளாசினார். இப்போட்டியில் சதம் அடித்த இந்தியாவின் நிதிஷ் குமார் ரெட்டி, 20 இடம் முன்னேறி 53வது இடத்தை கைப்பற்றினார். முதல் மூன்று இடங்களில் இங்கிலாந்தின் ஜோ ரூட் (895), ஹாரி புரூக் (876), நியூசிலாந்தின் வில்லியம்சன் (867) நீடிக்கின்றனர்.

'ஆல்-ரவுண்டர்' தரவரிசையில் இந்தியாவின் ரவிந்திர ஜடேஜா (405) முதலிடத்தில் தொடர்கிறார்.