புதுடில்லி: ஐ.டி.எப்., டென்னிஸ் தொடரின் பைனலுக்குள் நுழைந்தார் மாயா ரேவதி.
டில்லியில் ஜூனியர் ஐ.டி.எப்., தொடர் நடக்கிறது. நேற்று நடந்த ஒற்றையர் அரையிறுதியில் இந்தியாவின் மாயா ரேவதி 15, 'நம்பர்-2' அந்தஸ்து பெற்ற பிரான்ஸ் வீராங்கனை எலீஜா இனிசனை எதிர்கொண்டார்.
முதல் செட்டை 6-4 என வென்றார் மாயா ரேவதி. 'டை பிரேக்கர்' வரை சென்ற அடுத்த செட்டை 6-7 என இழந்தார். கடைசி செட்டில் சுதாரித்த இவர், 6-2 என வசப்படுத்தினார். முடிவில் கோவையை சேர்ந்த மாயா ரேவதி, 6-4, 6-7, 6-2 என்ற கணக்கில் வெற்றி பெற்று, பைனலுக்குள் நுழைந்தார். இன்று நடக்கும் பைனலில் ரஷ்யாவின் எக்டரினாவுடன் மோத உள்ளார்.
ஆண்கள் ஒற்றையர் அரையிறுதியில் இத்தொடரின் 'நம்பர்-1' வீரர், இந்தியாவின் ரெத்தின் பிரனவ் (திண்டுக்கல்), 4-6, 1-6 என தென் கொரியாவின் ஹவாங்கிடம் தோல்வியடைந்தார்.