வருவாய்த் துறையில், இ.பி.எம்.எஸ்., எனப்படும், 'எலக்ட்ரானிக்ஸ் புரமோஷன் மேனேஜிங் சிஸ்டம்' என்ற திட்டத்தின் கீழ், கடும் நெருக்கடி ஏற்படுவதாக ஊழியர்கள் கூறுகின்றனர். துறையில் கிராம உதவியாளர்கள் முதல் தாசில்தார்கள் வரை பணிகளில் பதவி உயர்வு வழங்க, ஊழியர்களின் பணிப்பதிவேடை இணையத்தில் பதிவேற்றம் செய்ய வேண்டும். 30 ஆண்டுகள் பணியாற்றும் ஒரு ஊழியருக்கே பதிவேற்றம் செய்ய, மூன்று மணி நேரத்திற்கும் மேலாகிறது. ஆனால், மாநில அளவில் பணியாற்றும், 50,000க்கும் மேற்பட்டோர் விபரங்களை நான்கைந்து நாட்களில் பதிவேற்றம் செய்ய நெருக்கடி கொடுப்பதாக புலம்புகின்றனர்.


அதே சமயம் பதிவேற்றம் செய்யும் மென்பொருளில் தொழில்நுட்ப ரீதியாக நடைமுறை சிக்கல்கள் பல உள்ளன. நகர்ப்புறங்களில் பட்டா வழங்க, 15 நாட்கள் அவகாசம் அளிக்கின்றனர். அதை வழக்கமான பணிகளுக்கு இடையே களஆய்வு செய்து வழங்க நடவடிக்கை மேற்கொள்வதில் கூடுதல் அவகாசம் தேவை. அதை தர மறுக்கின்றனர்.விண்ணப்பம் முதல் அனைத்தும் ஆன்லைனில் மேற்கொள்ளப்படுகிறது. ஆனால், அதற்கேற்ற கட்டமைப்பு கிடையாது. வருவாய் ஆய்வாளர் முதலான ஊழியர்களுக்கு லேப்டாப் உட்பட உபகரணங்கள் வழங்கவில்லை. இவற்றை சொந்த செலவில் கவனிக்க வேண்டியுள்ளது என்கின்றனர் வருவாய்த் துறை அலுவலர்கள்.